Idderein vreej op Elf van Elf

Idderein vreej op Elf van Elf
D’n 11e van de 11e velt dit jaor op zondaag. Dus kint geej lekker frühshoppe wies in de aovondaore. ‘t Startschot veur ‘t nieje vastelaovesseizoen. Op 11 november um percies 11.11 knalt ‘t kenon. VVG Jocus en de SHAV (de kasteleins rond de Mert en de Steinstraot) organisere auk dit jaor weer ‘t groëte äöpeningsfees op de Mert veur ‘t stadhuis in Venlo.

Mit onder andere: Weej Dreej, Jocus Hofkepel, Waan, Van Gelder, De Drekskaters, Station America, Pats, Bram en Ruud, Thei en Marij, Herm en Bert, de Kammeraödjes, Noud en Tim, Marco en Sandra en Döbbel hae, Döbbel het!

De nieje börgemeister
Traditioneel losse Vorst Joeccius XI, en de börgervader de iërste scheut waonao de Prinse ‘t euverneme. Dit jaor hebbe we ‘n nieje börgemeister, zal hae aanwezig zien? Kom zelf kieke en misschiens kint ge um waal de hand gaeve?

Alle vereiniginge
Naeve Jocus zelf mit zien Prins Jeroen I zien auk alle wiekvereiniginge aanwezig. Vors, Prins & adjudanten en de Raode van Elf van De Wien, De Moeraskwakers, De Vaegers Vogelhut, Boete de Paort, Jocus Toekoms, De Törvers, De Gaeskaetel, ‘t Tremke en De Kwas  zulle allemaol in vol ornaat aanwezig zien om te geneete van deze biezondere daag.

Opstaeker
Taeves wuurt de niejen Opstaeker geprissenteerd. Dit jaor ontworpe door de Arcense kunstenaer Ruud van der Beele. D’n Opstaeker bliek al ech ‘n verzamelaersobjek. Vuul vastelaovesvierders spare ze al en prônke d’rmei op eur pekske. ‘t Is dan auk neet allein ‘n financieel steuntje in de rök van álle vastelaovesvereniginge, maar auk ‘n waardering veur de vuule honderde vreejwilligers die de dolle daag meugelik make. ‘n Initiatief van Oeles, Belhamels, Jocus en Wortelepin. Laot auk ôch waardering blieke en kaup d’r eine.