Hofbal 2008 al veur jaorwisseling oétverkoch

‘t Vurrig jaor bleek ‘t Hofbal al ein van de meis populaire evenemente te zien. “En dit jaor löp ’t eigelik precies ‘t zelfde”, alzoë Roel Versleijen veurzitter van de P&P. “Sterker nog, dit jaor is ‘t Hofbal al veur Ald op Niej oétverkoch en det is nog noëits gebeurd”.  Op 19 jannewarie zal in ‘t 165e jaor de 65e prins van Jocus bekind waere gemak. Vanwaege ‘t jubileumjaor zal Jocus extra oétpakke op dit Venlose galabal. ‘t Nieje dreejspan zal in ‘n volledig niej Hofbaldekor op verassende wies bekind waere gemak aan ‘t Venlose volk.

Naeve dees bekindmaking van de nieje Venlose Jocusprins en zien twië adjudanten zulle tal van artieste op Jocusbühne optraeje wao onder nationale sterre wie George Baker en Des’Ray de vruugere diva van ‘2 Brothers on the 4th Floor’. Waat vuul minse neet mier weite, is det Des’Ray oftewaal Desiree Manders oëits begôs as zangeres van Jocus’ eige Hofkepèl. ‘’Veur dees gelaegenheid zal Desiree nog eine kiër same mit de Hofkepèl zinge’, vertelt Jack Schattorjé, veurzitter van ‘t Hofbalcomité, enthousias. Wae de nieje Stadsprins wuurd? Det weit hae nog neet, maar ‘dae nieje Hoëgheid zal gruëts waere ôntvange’.