Historische stap: Jocus en Jocus Toekôms same vaerder
Op Vastelaoveszôndaag, 15 fibberwari 2015, teikene Jocus Toekôms en Venloosch Vastelaoves Gezelschap Jocus ein kônvenant veur ‘t samegaon van dees twië Venlose Vastelaovesvereiniginge. Vanaaf det moment wuurt Jocus Toekôms as niej kommissariaat ein volwaerdig onderdeil van Venloosch Vastelaoves Gezelschap Jocus.
D’n achtergrond veur dezen historische stap vormp ‘t streve van beide vereiniginge um de jeugvastelaovend ein nog vastere plaats in de Venlose gemeinschap te beeje. Daonaeve wuurt auk de kôntinuiteit van Jocus Toekôms gewaarborg.
As volwaerdig onderdeil van “groëte broor” Jocus behild Jocus Toekôms zien eige identiteit. De organisatiestructuur, eur logo en oprichtingsdatum waere in iëre gehalde. Op dees wies waere de aldste Vastelaovesvereniging Jocus én de aldste Jeugdvastelaovesvereiniging Jocus Toekôms éín vereniging. Alzoë waere alle leeje van Jocus Toekôms Jocuslid.
Jocus Toekôms haet binne de Venlose jeugvastelaovend ein unieke rol as initiator en kertrekker. Vanaf eur oprichting in 1951 haet zeej as pioneer de jeugdvastelaovend ein plaats gegaeve. De twië vereiniginge völle mekaar, mit bestaonde kinnes en ervaring aan, um de Venlose jeug aan te spraeke. Ein moei veurbeeld is de jeugdzitting “Half Haenke” (zeen blaad 11) die Jocus Toekôms en Jocus de aafgelaupe 2 jaor same organiseerde.
Jocus organiseerd sinds inkele jaore diverse evenemente um de jeug beej de Vastelaovend te betrekke. Beejveurbeeld ‘t Jeug Vastelaoves Leedjes Kônkoer (leedjeswedstriéd veur Venlose basisschoële) en Jocus Pocus (speciale vastelaovesmiddaag in de Maaspoort veur en door de jeug) op Vastelaoveszondaag. Taeves is d’r ein hechte samewerking mit Stichting Herfshane (podium veur jônk vastelaovestalent tösse 16 en 25 jaor),
In de aafgelaupe periode hebbe twië projekgroepe, bestaonde oét leeje van beide vereiniginge ‘t samegaon ônderzôch. D’n eine projekgroep haet zich gerich op de organisatorische, juridische en financiële facette. D’n andere projekgroep haet ein kônstruktieve samewerking mit organisatie van aktiviteite oétgewerk.
Dit alles wuurt op Vastelaoveszondaag bekrachtig mit ein officieel moment wao-op Jocus Toekôms officieel en volwaerdig deil wuurt van ‘t Venloosch Vastelaoves Gezelschap Jocus. Eine belangriéke stap in de historie van de Venlose Vastelaovend.