Herm Pollux; niejste drager van Jocus hoëgste onderscheiding

Gisteraovend is Herm Pollux door Vors Joeccius XI, Harry Pouwels, gedecoreerd in de orde van de Zwalm, Jocus hoëgste onderscheijing.  Daomei verasde de Vors d’n ald sirremoniemeister dae efkes teveure as de Nederlands spraekende Pruus Hennes in de Jocusbuut stond. Nao zevetiën jaor as sirremoniemeister besloot Herm Pollux det ‘t genôg waas. Veur Jocus ‘n raeje beej oétstek um dit boegbaeld van Jocus te iëre mit de Zwalm.

Volges Vors Joeccius is Pollux ‘n man dae beej laeve al geschiedenis haet geschreve, umdet de rol as sirremoniemeister um op ’t lief waas geschreve. Herm Pollux is in einen aom te neume mit Bertes Hummel, Max Munnich en al die andere eminente veurgengers. Umringk door zien femilie kreeg Herm de versiersele door Pouwels umgehange mit de wäörd: ‘Herm, Venlo hilt van dich en Jocus is gruuëts op dich.’