Harie en Josefien in ôndertrouw

Aafgelaupe zaoterdaag haet ’t nieje boérebroelofsgezelschap van FCV oét ’t Ven zich in eine sfeervolle hoonderstal aan ’t Venlose publiek veurgesteld.  Kort daoveur haet ’t kersverse boérepaar Harie (Hai van Rensen) en Josefien (José Thijssen–Linders) de ôndertrouwakte geteikend dae noow in ’t kesje aan ’t stadhoés hingk. Op ein schitterende nieje jocusbuun môch idderein zich tiédes ’t traditionele ‘Holadiejeja’ veurstelle.

Veuraaf aan dit gebeure môchte de Meulewiekers, d’n ermen tak, nog eine kier op Jocusbuun. Pieter en Joyce leete eur kiendje kiéke. Dit ging aevel neet zônder slaag of stoët. De kleine bôksebaom bleek op ’t moment suprême ônvindbaar. Ein zeukactie in de catacombe van de Maaspaort waas gelökkig succesvol zoédet ’t Venlose publiek asnog de kleine Heinke, Vors Sobath II, kôs aanschouwe.

De foto’s van ‘t Boeremoosbal zien heej te bekieke (en nao te bestelle). ‘t Broedspaar stelt zich oétgebreid veur op www.boerebroelof-fcv.nl.