Half Haenke – Truuk van weggewaes
Jeugzitting “’t Half Haenke”, det wilse neet misse!
Ein alde tradisie wuurt vanaaf dit jaor weer nie laeve in geblaoze. Venloosch Vastelaovesgezelschap Jocus en Jocus Toekôms hebbe de hand inein geslaage um ein vastelaoveszitting te organisere speciaal veur en door de jeug van de Venlose gemeinschap.
Dees zitting vindt plaats op woensdaagmiddaag 30 jannewari in theater De Maaspoort. Heej zal ‘t decor van de Raod van Elf van Jocus klaorstaon um de Raod van ‘t kleinere breurke Jocus Toekôms heejin zitting te laote neme um alzoë de Venlose jeug wies 15 jaor te kinne ôntvange.
Optraejes waere deze middag netuurlik ouk groëtendeils door de kinder zelf verzörg. Dit beteikent det de winnaer van ‘t JVLK eur Pappegeieleedje zal bringe, Eefje as kersverse winnaer van de Herfshane mit zien leedje ‘Maar waat bin ik braaf’ acte de presence gaeve en netuurlijk meuge de 4 winnende Jocus leedjes neet ôntbraeke. Netuurlijk ouk de winnaers van ‘t Bliericks jeugleedjeskonkour. Boéte zang netuurlijk ouk dans. Dit gebeurt door de mini’s en de meidedansgroep van D’n Oeles oét Tegele en de dansgroep van de Moeraskwakers oét ‘t Ven. Veur de kinder zulle d’r ouk jeugbuuts gebrach waere door Stan, Sjuul en Sjraar. Ein spektakel det netuurlijk ouk bezôch zal waere door de Venlose stadsprins en zien adjudante. Kortum, eine middaag dae de Venlose vastelaovend truuk bringk beej de kinder.
Kôm same mit dien vrindjes en vrindinkes, mit dien klas of de club waose lid van bis of misschiens waal mit de ganse jeugvereiniging deeze middaag vastelaovend viere! De zitting begint um 14.00 oor en zal wies 16.00 oor deure.
Veur ein versnapering en ein drenkske wuurt gezörg en asse miër wils kin det gekoch waere veur € 0,50.
Kaarte koste €3.00 per stök en zien te bestelle via halfhaenke@gmail.com.
De jeug haet de toekôms, dus weej zeen ôg gaer woensdaag 30 jannewari!