Gulden Humor veur Frans Pollux

In al zien wiésheid haet de algemeine vergadering van de Samewirkende Limburgse Vastelaovesvereiniginge, op veurspraok van eur bestuur, beslaote um d’n hiër Frans Pollux veur te draage as laureaat veur de Orde van de Gulden Humor in ‘t jaor 2015.

As lid van de roemruchte Venlose vastelaovesdynastie Pollux, is Frans al van jôngs aaf aan gezaegend mit eine joeksige inbors en haet hae de schaele wazel en piassekraom hoëg in ‘t vaan staon. Neet allein ein werm kloppend hert veur de vastelaovend maar ouk ziene kiëbus is d’r döks vol van en dao kômme dan al die kwante leedjes oét.

Venlo ôntliënd ein groët deil van zien vastelaovesidentiteit aan de talriéke, prachtige en joeksige leedjes die wies vaer veurbeej de stadsgrenze bekind zien. Ein ônbetaalbare schat dae sinds 2003 veur ein groët deil door Frans is gevöld. Hae haet heejmei ein belangriéke beejdraage geleverd aan ‘t moeiste stök kultuurgood det weej riék zien.

Prominent lid van OB de Woers en v.v.v.v.v.v.v.v.v.v.v. de Waus, veuropgaond beej De Naate Raaf. Daonaeve döks op Jocusbuun gestaon as beejveurbeeld Hofbalzenger of begeleider van De Bôks op de Prônkzitting en netuurlik, as adjudant, steunpilaer gewaes van Prins Fred I in 2005.

Jocus is d’r biezônder gruuëts op det d’r weer emus oét Venlo dees groëte iër te beurt velt en vanaaf dees plaats wille weej Frans dan ouk van herte perfitsia winse mit de veurdrach as laureaat veur de Orde van de Gulden Humor.