Gulden Humor 2012
Op zaoterdaag 24 november wuurt in ‘t Venlose stadhoés de Gulden Humor 2012 oétgereik aan Gilde de Blauw Sjuut. ‘t Is veur ‘t iërst det de Bond van Samenwerkende Limburgse Vastelaovesverenigingen (SLV) Venlo as stad kies veur de oétreiking van dit hoëge iëreteike. “D’r is jaorelang euverleg geveurd tösse Jocus en ‘t SLV um dit meugelijk te make. Weej zien erg gruuëts det weej gashiër meuge zien veur deze hiël biezondere happening, temiër umdat weej ôs biezônder herkinne in de laureaat van dit jaor: de Blauw Sjuut”, alzoë Peter Bastiaans.
De gansen daag steit in ‘t teike van dit fees. Ein fees det nog noëits iërder in Venlo woort georganiseerd. In de vruuge middaag verzamele de bestuurders van de grutste vastelaovesvereiniginge van Limburg zich beej ‘t Limburgs Museum. ‘t Zal dao ‘n vrolijk treffe waere van vastelaovesvierders. In ‘n kleurriék dekor van vorste, prinsemutse en vaere zal dao de laureaat ontvange waere. Gilde de Blauw Sjuut zal dao vlak veur 14.30 oor aankômme in eur traditionele scheepswage (narreschip). Um klokslaag 14.30 oor zulle zeej mit muzikale begeleiding van Showorkest Harmonie Fortissimo in optoch door de binnestad van Venlo trekke. Eur route indig rond 15.00 oor beej ‘t Venlose stadhoés alwao ‘t stadsbestuur de vastelaovesvierders welkom hit. Naodet de laureaat is gehöldig zal idder zich gaon opmake veur ‘n groët fees in theater de Maaspoort.
In de late middaag zulle alle gaste van de Limburgse vastelaovesvereiniginge zich verzamele in de Venlose horeca, van wao oét ze mit joekskapelle in verschillende kleine optochte nao de Maaspoort waere begeleid. “De ganse binnenstad meug weite det d’r fees is”, alzoëJack Schattorje, veurzitter van ‘t organiserend comité van Jocus. “Dit is ein evenement, zo wie det maar aaf en toe in ‘n stad as Venlo veurkump. De môs d’rbeej wille zien.”
Vanaaf 20.11 oor start ‘t groëte fees in de Maaspoort. In ‘n zaal, dae qua inrichting, sfeer en stiél sterk duit dinke aan d’n Hofbalzaal, zal ‘n spectaculair programma plaatsvinde. “Zonder dat ik al tevuul wil verklappe, kin ik zegge dat we äöopene mit ‘n lasershow wao in Venlo zich prissenteert aan alle Limburgse gaste. De trots veur dees stad druup d’r vanaaf”. Auk ten aanzeen van de meziekprogrammering zien alle registers aope getrokke. “Bram en Ruud, de Tôddezek, Minsekinder, W-Dreej en ein speciale verrassingsact van Jack Poels um middernach”. Straolend middelpunt van dit groëte fees zulle de leeje zien van de Blauw Sjuut.
Kaarte veur de feesaovend in de Maaspoort zien te kriege in Sporthuis Olympia aan de Groëte Baekstraot in Venlo of via info@jocus.nl en koste € 25 per stök.