Gôlde Narrekap 2009
Op maondag 25 mei is tiedes de jaorvergadering van de Samewirkende Limburgse Vastelaovesvereiniginge (SLV) bekindgemak det d’n hiër Jan Pollux dit jaor de iër ten deil velt um de Gôlde Narrekap 2009 in ontvangs te meuge neme. De oétreiking vindt plaats tiedes ‘t jäörlikse fees van de SLV op 28 november op kestiël Hoensbroek te Hoensbroek. Jan Pollux zal beej dae gelaegeheid auk waere opgenaome in de Broederschap van Gôlde Narrekapdragers.
De Gôlde Narrekap, de hoëgste Limburgse vastelaovesonderscheiding, is ‘n 4-jäörlikse onderscheiding dae oétgereik wuurt door ‘t bestuur van de SLV. De 16 Lidvereinigingen van de SLV zien de 16 Stadsvastelaovesvereinigingen in Limburg.
Venloosch Vastelaoves Gezelschap Jocus is bliej mit de keus van ‘t bestuur van de SLV, det haet ingestump mit Jocus’ veurdrach in de persoën van Jan Pollux. Nao miër as 55 jaor in de buut te hebbe gestaon wuurt Jan Pollux toegevoog aan de indrökwekkende liés van Gôlde Narrekap-dragers.
Jan Pollux wuurt mit dees onderscheiding geiërd um zien miër dan humoristische kiék op ‘t laeve van alledaag. Det uut zich in zien inmiddels ontelbare buuts die hae in gans Limburg, maar veural in de omgaeving van Venlo as “Stedje van lol en plezeer” ten gehuure haet gebrach en nog steeds actief bringk. Hae duit dit al miër as ‘n halve iëuw zonder persoëne of organisasies te kwetse, maar door ze ‘n kritische speegel veur te halde. Jan is ‘n vastelaovesvierder, dae al sinds vuule jaore as Professor Humoris Causa aan de Narrenuniversiteit, de kuns versteit um zijn kinnis en ervaring door te gaeve aan andere buutereedners en vastelaovesartieste.
De nominatie van Jan Pollux veur de Gôlde Narrekap 2009 is ‘n erkinning van ‘n Limburgse vastelaovesgroëtheid.