Gezellige seniorezitting in de Maaspaort

Terwiel d’r nog minse plaats môtte neeme in de zaal, zit de stumming d’r al good in. Jocus Hofkepel speult de leedjes van vruuger en die waere volop meigezônge. We hebbe ’t euver de SOB seniorezitting. Georganiseerd door de Stichting Open Bejaardenwerk i.s.m. Jocus det zörg veur ’t programma en de prissentasie.  Dees zitting wuurd gehalde op woensdaag en donderdaag veur de aldere minse van Venlo. In oktoëber wuurd d’r gestart mit de veurbereidinge en waere de iërste kaertjes al besteld door bezeukers die ’t veural neet wille misse. Daorum is de zaal ouk twië kiër oétverkôch! Doézend minse van jôngk (65) wies ald (95) geneete van ’t programma.

Jocus’ Raod van Elf en Hoëgheid Prins Ton I mit zien adjudante Jack en Frans äöpene de zitting. En dan kump d’r ein moeije verassing: de aldste man ter wereld, ‘nne bisschop oét Spanje, en sprik Prins Ton en adjudant Frans toe, die hebbe vruuger nog veur um gewerk. Dan volg d’r ein keur van artieste, Claar Boots en Frans Driessen, ’t Boerebroelofsgezelschap van de Mustangs, Herm Pollux steelt de show as zien eige vader Piet. Lekkere bekinde leedjes mit Marjan en Hay van de Ham en Wiel Vestjens.

“t Parodiste duo High Society oét Remund wuurd beloënd mit ‘n staonde ovasie. En wie det op ‘n zitting huurt volg dan de dansgarde. Deze kiër HG Blau Gold oét Duisburg. Jansen en Janssen, Bart,Jacques-Paul en Mark, Pierre van Helden, Bram en Ruud, Petro, Mark, Miriam en Bernie staon op de buun en bringe joeks en stumming is de zaal. Dan nog ‘n leuke parodie mit de Moorbleumkes. Nog ‘nne kiër de hand opein veur HG Blau Gold en dan de klapper van d’n aovend: de Limburgse nachtegaal Beppie Kraft.

Mit zien bekinde hertelikke aard en de heerlikke leedjes zörg Beppie veur ‘n geweldige aafsloéting van deze aovend en hebbe de minse genaote van ‘n moeije en gezellige veurstelling.