Gascolumn: De Venlose Springsteen of toch de zingende houfredacteur?

‘t Is idder jaor weer dezelfde vraog die door Venlo raos: Wae wuurt de nieje Prins van Jocus? Wuurt ‘t eemus van binne de vereiniging, of toch eemus van boéte? Is ‘t eemus dae waat bereik haet dit jaor, of is ‘t gewoën ‘ne bekinde Venlonaer? Veur welke Venlonaer kump euver iets miër as dreej waeke dae jôngesdruim oét? Wae kump d’r op d’n Hofbal oét as nieje Venlose Stadsprins?

Aafgeloupe zaoterdaag waas ‘t Sef Derckx dae d’n iërste hint de waereld in steurde. Hae vroog zich aaf of de nieje Prins oét “de Naate Raaf” zoel kômme. Maar wao is dae hint eigelik op gebaseerd? Is ‘t ein wanhaopspoging um ‘t ganse “Prinseraoje” intellik op gangk te helpe? Of wet hae ‘t zeker en wuurt ‘t dit jaor ech eine “Raave-prins”.

‘t Zien euveriges idder jaor dezelfde name die door Venlo rônd gaon. “Wuurt ‘t dit jaor dan ech Herm Pollux, of gokke we weer op Lex Uiting? Meschiens Ruud Stikkelbroeck waal! Nae, ik dink toch det ‘t Frans Pollux wuurt.” ‘t Zien vuuël gehuúrde oétspraoke oét ‘t verleeje. En gen van dees veer hiëre is ‘t oeits gewaore. ‘t Kin dus nog altiéd. Maar wie kump me in dit rieke terech?
Idderein wet det Herm Pollux jaore langk ‘Sirremoniemeister’ is gewaes beej Jocus en eine gaer gezeene man is binne Venlo. Lex Uiting haet (ZOEMAAR) op de kaart gezatte en is ôndertösse werkzaam beej de VARA. Ein naodeil veur Uiting is waal det hae in Amsterdam woënt en dus neet in ‘t perfecte prinseplaetje pas. Ruud Stikkelbroeck duit sinds 2003 mei aan de ‘Leedjesaovend’ en mak jaorelangk deil oét van ‘t duo Bram&Ruud. Taegewaordig stelt hae ‘t op de buun ônder Bram Holla. Desalneetemin lök ‘t um um nog altiéd ein winnend leedje te zinge. Stikkelbroeck is werkzaam as houfredacteur beej Omroep Venlo en is eine ‘Naate Raaf’. Frans Pollux is eine redelik nieje naam op dit lieske. D’n adjudant in 2005 van Prins Fred I is veural bekind oét ziene Neet oét Lottum tiéd, van ‘Pollux duit Springsteen’ en van ‘t al jaore schriéve van winnende Vastelaovesleedjes. Pollux, dae ouk eine ‘Naate Raaf’ is, is meschien waal d’n topfavoriet dit jaor.

Boéte de favoriete zien d’r idder jaor ouk weer eine aantal waore outsiders. Zoë is de veurzitter van Showorkes Harmonie Fortissimo Roel Versleijen dae idder jaor weer op ‘t lieske steit en ouk dit jaor veurzichtig geneump wuurt. Ouk Erik Schnock, vice veurzitter van Jocus en bestuurslid van de Venloup, behuurt meistal tot dit lieske outsiders. Ouk dit jaor wuurt Schnock gezeen as kandidaat veur ‘t Prinsschap, zeker umdet de Venloup in 2015 tiën jaor besteit.

Aevel, wuurt ‘t waal eemus dae enigsinds veur de hand leet? Kump Vors Joeccius XI Harry Pouwels waal mit eemus dae jaor in jaor oét geneump wuurt? Of is ‘t tiéd veur eine Prins wao eigelik neemus ‘t van verwach? In 2010 woord Marcel Hogenhuis oét d’n hoëge hood getouverd, iets waat eigelijk neemus had verwach. Is ‘t neet ens tiéd veur eine Hoëgheid oét de binnestad? Det is toch waat wao ‘t volk jaore um rup? De Prins van vurrig jaor kwaam waaleswaor oét de binnestad, maar is ‘t noow neet d’n tiéd veur eemus dae nog altiéd in de binnestad aktief is? Eemus as Chiel van Rijn, direkteur van Media Markt. Of weer ens eine kastelein, um dan te dinke aan Louis Klaassens, eigenaer van de Klep? ‘t Blief gisse.

Jacques – Paul Joëste, liéraar Nederlands op College Den Hulster én zenger, moch ‘t aafgeloupe sezoen de scèpter zweie as Prins Jacques – Paul I. Lang woord ‘t good stil gehalde en waas d’r neemus dae aan de zenger dach. Maar opens waas d’r eemus dae reep det Stef Bos op ‘d’n Hofbal’ aanwezig waas. Umdet Joëste lang haet samegewerk mit Bos waas ‘t ein mekkelikke optelsom en waas ‘t in de letste halve waek veur haos idderein duudelik det Joëste oét zoel kômme as Prins.

Wae d’n opvolger van Prins Jacques-Paul I wuurt is nog efkes aafwachte. Waal is al duudelik det de gans stad zal roope: ‘Zô’nne gooje hebbe weej nog noeit gehad!’

Geej kint mei Prinse-raoje via http://www.facebook.com/JocusVenlo