Fontys studente make kinnes mit Boerebroélof

Op woensdaag 21 augustus jongsleeje heel Fontys Hogescholen Venlo zien jaorlikse IntroFestival veur nieje studente. ‘t Doel van d’n daag is um eur kinnis te laote make mit Venlo en eine indrök te gaeve waat de stad naeve de opleiding allemaol te beeje haet.

Venloosch Vastelaoves Gezelschap Jocus haet sinds 4 jaor ein nauwe samewerking mit Fontys Hogescholen Venlo en is as partner verbônde aan ‘t IntroFestival. As ônderdeil van ‘t introductie program kriége de nieje studente door Jocus eine indrök van de Venlose Vastelaovend mit ôs Boerebroélof in ‘t biezonder.

Dit jaor hebbe zô’n 600 studente, verdeild euver 20 groepe kinnis gemak mit de Venlose Boerebroélof. In samewerking mit José Duckers, Foto Kino Linders en verschillende Jocus’ leeje woort in Preuf en Praotlokaal De Klep de boerebroélofstraditie oétgelag en woord ouk de Boerebroélofsfilm, zoëas door Jocus gemak veur de Floriade, getuuënd.

Mit iddere groep woord ‘t bezeuk gehiél in stiel aafgeslaote mit ein groepsfoto in Boerebroélofskleier as aandinke aan ‘t bezeuk beej Jocus. Eine leuke middaag dae de studente haopelik inspireert um kômmend jaor de Vastelaovend in Venlo te viere.