Finaliste Leedjesaovend 2014 bekind

Let op: ‘t program in de zaal start al um 19.15 oor, det is 30 minute iërder as op de kaarte vermeld steit!

De finaliste van Jocus Leedjesaovend zien bekind. Aafgelaupe zaoterdaag 23 augustus vônd in ‘t Ald Weishoes de Veurselectie plaats. Mit elf gevarieerde leedjes as oétkôms.

Onder de finaliste zien maar leefs viéf debutante. Tessa Hinssen, Sadie Peeters, Harry van Dreumel, Frank Jacobs en Gilbert Schmitz zônge nog neet iërder op de Leedjesaovend. De winnaer van 2012 Hay Smeets is, naeve onder andere duo Noud Janssen en Tim Peeters truuk van weggewaes.

Harry Pouwels, veurzitter en Vors van Jocus, kiek d’r nao oét: “De leedjes zien van ein biezonder hoëg niveau. Alle deilnemers hebbe eur inspirasie en kreativiteit in de letste maonde gebroek um stök veur stök leuke leedjes te make. Dit belaof ein hiele kwante Leedjesaovend te waere. Alle ingrediënte zien in hoés um d’r eine geweldigen aovend van te gaon make. Naeve ein verniejde formule hebbe we nog  eine gas dinger in ‘t vaat zitte. Dao-op kômme we vlak veur de Leedjesaovend truuk.”

Iërder makde Jocus al bekind det de Leedjesaovend wuurt verniejd. Zoë is de wedstriédformule verniejd, kin ‘t publiek via sms stumme en is ein kompilatie van de leedjes van de finaliste veuraafgaond aan de Leedjesaovend al via Umroop Venlo te zeen.

Tiedes Opus Jocus Leedjesaovend strieje elf leedjes um “de Funs”. Nao ein iërste rônde mak de vakzjurie ein keus veur zeve leedjes. In de twiëde rônde zal waere oétgemak waat de veer Vastelaovesleedjes veur de kômmende Vastelaovend in Venlo gaon waere.

Kaarte zien te koup beej Theater de Maaspoort, Sporthuis Olympia Jan Klein, Slegterie Schreinemachters, Plus Benders Venlo en via www.jocus.nl en koste €17,50.

Door de nieje zaalindeiling zien d’r dit jaor allein staonplaatse te kaup. D”r zien genog krökke aanwezig. ‘t Publiek kin in ‘t dekor van de Leedjesaovend geneete van ein aovendvullend programma mit, naeve de elf leedjes, optraejes van ônder andere DaMaZoë, Thei en Marij, W-Dreej en Jocus’ Hofkepel.

Vanaaf zaoterdaag 27 september wies de Leedjesaovend op zaoterdaag 4 oktoëber wuurt dageliks ein compilatie van de elf leedjes oétgezonde op Omroep Venlo tillevisie en radio. Op dees wiés kinne de zjuries en ‘t publiek alves kinnesmake mit de elf finaliste.

Opus Jocus 2014 haet plaats op zaoterdag 4 oktoëber in Jocus’Hoonderstal inTheater de Maaspoort in Venlo en is live te zeen op Umroop Venlo Tillevisie.