Expositie euver vastelaovend gratis te bezeuke
In de Stadsbibliotheek Venlo is vanaaf zaoterdaag 18 jannewari ein expositie te bezeuke mit as thema carnaval. Initiatiefnemer is de stichting Limburgs Carnavalsmuseum. De tentoënstelling euver carnaval in Groët-Venlo is zes waeke gratis te bezeuke. Ouk Jocus zal zien historie tiédes dees tentoënstelling prissentere.
‘t Bestuur van ‘t Limburgs Carnavalsmuseum haet in november 2013 ‘t plan opgevat um ein expositie te organisere euver de carnavalsviering in de gemeinte Venlo. De stichting besteit sinds de jaore ’60 van de vurrige ieuw. In ‘t verleeje zien d’r fysieke musea gewaes in Echt, Limbricht en Thorn. In 2000 is de umvangriéke collectie in broekliën gegaeve aan ‘t Limburgs Museum. De aafgeloupe jaore haet de stichting veural op d’n achtergrônd gewerk. D’r is in 2006 nog eine archivariscursus georganiseerd en tiédes de Floriade waas LCM beej de opveuring van de boérebroelof.
Nao jaore van werke in de anonimiteit traejt ‘t bestuur weer op de veurgrônd. In 2014 zien d’r twië initiatieve die geïnitieerd zien vanoét ‘t Carnavalsmuseum. Alle Limburgse carnavalsvereiniginge en de gemeintes zien gevraog um de laegstaonde pande in de centra op te fleure tiedes de carnavalsperiode. Daobeej is d’r ein expositie georganiseerd euver de carnavalsviering in de gemeinte Venlo. Vanaaf zaoterdaag 18 jannewari 2014 is de tentoënstelling zes waeke gratis te bezeuke. De expositie vind plaats op de 2e etage van de Stadsbibliotheek Venlo. De bibliotheek is doordewaeks geäöpend van 9.00-20.00 oor en op zaoterdaag van 9.00- 17.00 oor.
‘t Is ouk meugelik um rôndgeleid te waere. De koste bedrage € 5,- inclusief ôntvangs mit kôffie en vlaai. De rôndleidinge vinde plaats op zaoterdaag. Kiék veur miër informatie of um aan te melde op www.limburgscarnavalsmuseum.nl ‘t Projek kint vuuël partners, meiwerkers en sponsors in ‘t biezônder meuge vermeld waere CAS exhibition partners en BLAUW communicatie. Dees twië bedriéve ôndersteune ‘t bestuur van ‘t carnavalsmuseum beej de daadwerkelijke organisatie. Vriédaag 17 jannewari vind de äöpening veur genuuëdigde plaats. De äöpening wuurt verrich door börgemeister Antoin Scholten van de gemeinte Venlo.