Exposisie Jocus-Hofteikenaer Leon Peeters

Vanaaf 7 jannewari exposeert Jocus-Hofteikenaer en kunstenaer Leon Peeters in Hotel Wilhelmina in Venlo vastelaovesschilderieje en schetse.
 
Groëte acryl deuk mit as thema “de vastelaovend in Venlo” en de schetse die Leon mak as studies veur diverse vastelaovesillustraties en affiches veur Jocus.
 
Leon Peeters is as illustrator verbônde aan nederlands aldste vastelaovesvereiniging Jocus.  Veur zien schilderieje is de vastelaovend in al zien facette ein inspiratiebron veur Leon. De kleurriéke laevendige bônte wirwar, de meziék, de boerebroélof, maar ouk de kater en ‘t “aswoensdaag” geveul.  Loupend door de stad op eine drökke vastelaovesdaag verandert ‘t beeld  nao iddere maeter. De oétdossinge, de pekskes, de meziék, de geure, alles wuurt dan anders en intenser. “Mit de Vastelaovend en de boerebroélof hebbe weej in Venlo ein  traditie in hand, die weej môtte koestere en vaerder môtte cultivere”.  Biezônder is det van ein van zien schilderieje door Jocus eine poster wuurt oétgebrach veur de Vastelaovend 2012.  Leon is ouk bekind um zien groëte wandschilderinge van sôms miër dan 5 maeter groët. In Hotel Wilhelmina luuët hae aevel ouk nog kleine studies zeen van zien teikeninge die hae mak veur de Träöt en de CD van Jocus. Neet te misse heejin is d’n invlood van ‘t teikenwerk van ziene groëte veurganger Piet Camps. “ Piet is veur mich nog altiéd de ultieme vastelaoves-illustrator” zaet Leon heejeuver.

Hotel Wilhelmina is de ganse waek geäöpend en geej ziet vreej um binne te loupe um dees fantastische expositie te kômme bekiéke.