Op zaoterdaag 6 oktober viert Jocus zien 16×11 jäörige verjäördaag. Daags daonao op zondaag 7 oktober äöpent de nieje jubileumtentoënstelling in ‘t Jocus Museum.

In de tentoënstelling Dit is Venloos roem wuurt einen inkiék gegaeve in de historie van Jocus en de Venlose vastelaovend vanaaf de negetiënde iëuw.

Op dit moment wuurt de nieje tentoënstelling vormgegaeve. Onderwerpe die aanbod kômme zien de alde Jocus historie in de 19e iëuw, de Groëten Optoch, Boerebroélof, ‘t Venloos vastelaovesleed, joekskepelle en De Träöt. Bezeukers kinne heejin op verschillende wiés eur beejdrage levere. 

Ervaring oét de jubelexpositie gehalde beej ‘t 15×11 jäörig jubileum in Domani in 2007 haet geliërd det Venlo vuuël vastelaovesschatte koestert die veur dees gelaegenheid ein schoëne plaats en ein groët publiek verdeene.

Geej as bezeuker kint unieke en biezondere museumstökke aanbaeje die meugelik tentoëngesteld waere. Heb geej euver geneumde onderwerpe ein biezondere foto of video-opname, ein moei veurwerp of messchien waal det prach schilderie? Laot ‘t gaer weite via archief@jocus.nl.

Oét de kollektiestökke zal ‘t Jocus Museum beoordeile op welke wiéze stökke ein passende plaats kin waere gegaeve. Beschikbaar gestelde stökke waere in broékliën genaome, aevel aanbaeje as schinking is neteurlik auk meugelik.

De jubeltentoënstelling Dit is Venloos roem wuurt geäöpend op zondaag 7 oktober en löp wies aan Vastelaovend 2019. Äöpeningstieje zien te vinde via www.jocus.nl.

Euver ‘t Jocus Museum:
‘t Jocus Museum, gevestig op ‘t Dominicanenplein in de binnestad, haet as doel um de historie van de Venlose volkskultuur en ziene vastelaovend in ‘t biezonder te laote zeen. Door middel van tentoënstellinge, rondleidinge en beejdrages aan aktiviteite die ‘t doel ondersteune.

Vanaaf 7 oktober is ‘t museum op vaste äöpeningsdaag te bezeuke. Daonaeve is ‘t meugelik um op aafspraok ein rondleiding te kriége. Miër informasie via www.jocus.nl/museum.

Euver ‘t jubileum Jocus 16×11 jaor:
Opgerich op 6 oktober 1842 is ‘t Venloosch Vastelaoves Gezelschap Jocus ‘t aldste vastelaovesgezelschap van Nederland. Jocus zal dit neet ônopgemerk veurbeej laote gaon.

In de laup van september wuurt miër bekind gemak euver Jocus zien jubileumaktiviteite. Want Jocus is jäörig, Venlo is jäörig: dus laot ôg verrasse!

 Hald www.jocus.nl en Jocus’ social media in de gate veur miër informasie.