Elf van Elf

Midde in de waek velt ‘t startschot veur ‘t nieje vastelaovesseizoen. Op woensdaag 11 november um precies 11.11 knalt ‘t kenon. Vors Joeccius XI, Börgemeister Bruls losse de startscheut waonao de Prinse ‘t euverneme. VVG Jocus en de SHAV (de kasteleins rond de Mert en de Steinstraot) organisere auk dit jaor weer ‘t groëte äöpeningsfees op de Mert veur ‘t stadhoés in Venlo. Alle vereiniginge
Naeve netuurlijk Jocus zelf mit Prins Lucas I zien auk alle wiekvereiniginge aanwezig. Vors, Prins & adjudante en de Raode van Elf van De Wien, De Moeraskwakers, De Vaegers Vogelhut, Boete de Paort, Jocus Toekoms, De Törvers, De Gaeskaetel, ’t Tremke en De Kwas zulle allemaol in vol ornaat aanwezig zien um te geneete van deze biezondere daag.

Opstaeker
Taeves wuurt de nieje Opstaeker geprissenteerd aan Börgemeister Bruls. D’n Opstaeker bliek al ech ‘n verzamelaersobjek. Vuul vastelaovesvierders spare ze al en prônke d’rmei op eur pekske. ‘t Is dan auk neet allein ‘n financieel steuntje in de rök van álle vastelaovesvereiniginge, maar auk ‘n waardering veur de vuule honderde vreejwilligers die de dolle daag meugelijk make. ‘n Initiatief van Oeles, Belhamels, Jocus en Wortelepin. Laot auk ôch waardering blieke en kaup d’r ‘nne!

Jeug
Niej is det de Venlose schoëljeug auk meihelp dit jaor. Vastelaovend is ‘n belangrieke kulturele uuting dae al iëuwe gevierd wuurt. Neet allein in Limburg en ‘t Rheinland maar auk vaer daoboéte. Op schoël is dao al vuul aandach aan besteejd. Op de hekke die rondum de Mert kômme te staon hange deuk. Deze deuk waere beschildert door lierlinge van de basisschoële.

Artieste
‘n Hiele stoet van artieste zal zörge veur ‘n feestelijke stumming. Netuurlijk speult auk de Jocus Hofkepel live op de buun. Maar leefs 4 bands staon noow al te popele um de bezeukers aan ‘t zinge en swinge te kriege. En alle artieste en bands kômme oét de eige regio! Miër as 30 artieste zörge mit de bands en de Hofkepel veur ‘n programma det um 11.00 begint en pas um 19.00 eindig. Tenminste op de buun. In de kefees rond de Mert en de Steinstraot geit ‘t fees gewoën door.

CD
Meziek neet allein live op de buun, maar auk um mei nao hoés te neme. De nieje Jocus CD zal as iërste aan hoëgheid Lucas I waere oétgereik. Mit dao-op de veer winnende leedjes van de onlangs gehalde Leedjesaovend Opus Jocus. Alle veer waere auk nog eens live gezônge.

Elf van elf, dan kumpse toch zeker zelf. Nao de start van ‘t 5e seizoen.Tot ziens op de Mert op de elfde van de elfde 2009 om 11.00.