Eefje Steijn kiek truuk op eine fantastische vastelaovend

Eefje Steijn haet vurrig jaor eine geweldige vastelaovend gehad. Det kwaam mei doordet ‘t  winnaer is gewaore van “’t Golde Ei”, de talentewedstried van de Herfshane.  Stichting de Herfshane is ein club van jônge en enthousiaste minse die zich tot doel haet gesteld um jôngere van 21 jaor en jônger enthousias te make veur vastelaovend door ze te ôndersteune, te stimulere en ein podium aan te beeje.

‘t Verhaol van Eefje begôs eigelijk op de hockeytraining.  “Weej mit ôs team ware veur de lol aan ‘t zinge toen mien trainster, Charlotte Peters,  taege mich zag det ik bes good kôs zinge en ens mei meus doon beej de Herfshane”, aldus de jônge zangeres. “Nou, det heb ik toen maar gedaon! Ik wis eigelik neet precies waat ik d’r van meus verwachte, maar ik kwaam d’r al flot achter det ‘t kei leuk waas.

De deilnemers krege de kans um ônder begeleiding van Frans Pollux ein eige leedje te schriéve. De kersverse artieste mochte dees leedjes prissentere tiedes de finale-aovend in café de Locomotief. “Ikzelf had noeit gedach det ik zoel winne, want ik vônd de andere hiël erg good”, zoë vertelt de winnares. “Miene mônd veel daorum van verbazing ouk vaer aope, toen bleek det ik had gewônne!”

As winnares haet ‘t mit vastelaovend vuuël optraejes gehad. Veural d’n daag van de boéteziting  waas veur Eefje ein  kei leuke  maar ouk spannende ervaring. Op 18 september ware de opnames van zien nummer in studio Theelen in Munstergeleen. Ein paar waeke daonao makde ‘t zien televisiedebuut tiédes de Jocus Leedjesaovend. Beejein waas ‘t ein groëte ervaring um mei te make!

“Ik raoj daorum ouk andere kinder aan um mei te doon, want ‘t is ‘t waerd” aldus de Venlose zangeres.