Döbbeldieke 66e editie van De Träöt noow te koup

Maondaagaovend woort op ôs Stadhoés de niejste editie van De Träöt geprissenteerd. De döbbeldieke 66ste oétgave is veur ziene verjäördaag kompleet verniejd. Ein niej formaot en vormgaeving laote alle foto’s, verhaole en advertenties nog kleurriéker en moëier zeen! De vaste Träöt laezer zal de vaste rubrieke en fotoripportages beslis truukvinde. ‘t Offisjieel orgaan van Jocus kint ouk diverse niejighede.

Dit jaor is De Träöt veurzeen van QR-codes. Dees veerkentige codes kinse scanne mit eine slumme tillefoon, oftewaal smartphone, um wiejer geleid te waere nao beejveurbeeld JocusTv veur video’s of www.Jocus.nl veur ein oétgebreide fotoripportage. Ouk is ‘t meugelik um mit de layar-app d’n umslaag te scanne mit de smartphone. Heejmei is ‘t meugelik um de speciale website van ‘t Jocus Dreejspan 2014 te bezeuke um eur nieje leedje Tarentelle te beluustere!

Wao vindse zô’nne houp foto’s, ‘n mikwe, ‘n sprookje, eine Prins en ein Prinses, ‘ne Koekwaus, schaele wazel, QR-codes en eine lekke tuup?  Of eine sinistere duustere vogel, vuuël Vrinde, sôkkeromes en sôkkertantes, draosbôkse en al ‘t letste niejs oét ‘t Jocusriék?

De Träöt is vanaaf noow te koup op dees verkoupadresse en kos maar €3,00.