Die Powerhose op Naopraote
Die Powerhosen zien op 13 jannewari tiedes ‘t traditionele "Naopraote" in de Maaspoort in Venlo de publiekstrekker. Die Powerhosen behoof haos gen introduksie, ‘t is dé Venlose Schlagerband. Daonaeve is ein optraeje van Banda Topa Tinga. Dees Ruiverse slaagwerkersgroep haet sinds 1998 al op vuul plaatse eur Braziliaanse ritmes laote huure.
D’n daag nao ‘t Boeremoosbal begint um 12.30 oor mit "Krense". Dit is de resepsie van ‘t nieje Boerebroelofsgezelschap van Vie Curie. Daonao start ‘t programma van ‘t Naopraote. Vurrig jaor leepe dees twië programmaonderdeile geliektiedig, waat door vuul minse as storend woort ervare.
Naeve die Powerhosen en Banda Topa Tinga haet ‘t Naopraote dit jaor ‘n hiël moëi programma. Netuurlijk zal ‘t nieje boerebroelofsgezelschap van Vie Curie, mit in eur midde ‘t broédspaar Susanne Jongen en Hay Geritz, zich aan ‘t publiek prissentere. Bram en Ruud traeje op. Maar auk niej talent zal van zich doon spraeke. Zoë zulle de Herfshane weer van de partie zien en guf de winnaer van ‘t Jocus Jeugvastelaoveskonkoer, de kinder van de Sint Martinusschoël, acte de presence. Netuurlijk kin ‘t publiek weer geneete van de veer winnende Jocusleedjes. Voor dans en acrobatiek zörg de Tanzgarde Krefeld-Stahlorf. De muzikale umliesting is in hand van de Prinsekepèl.
Euveriges zien d’r nog inkele Boeremoosbalkaarte te koup beej Sporthuis Olympia aan de Groëte Beekstraat 1 in Venlo.