De Venlose Reddingsbrigade (VRB) organiseert de Venlose Boérebroelof van 2015

Aafgeloupe maondaag haet ‘t bestuur van Venloosch Vastelaovesgezelschap Jocus beslaote um de Venlose Reddingsbrigade de iër te gunne um de Venlose Boérebroelof van 2015 te organisere. Jocus is tot dit besloét gekômme vanwaege ‘t feit det de VRB volgend jaor eur 80-jäörig jubileum haop te viére.

De Venlose Reddingsbrigade is al decennia lang ein begrip in en rônd Venlo. Veurzitter Kevin Herpers is erg gruuëts mit dees nominatie. “Weej zien hiël erg blie det we dees Venlose oertraditie meuge organisere”. Naeve ‘t zwumme zit de VRB zich ouk in op maatschappelijk en sociaal gebied. “Zoë hebbe weej as vereiniging mit vuuël vrijwilligers de getroffe inwoëners van Venlo geholpe tiédes de euverstruiminge in 1993 en 1995. In 1955 leidde det vrijwilligerswerk tot erkinning doordet weej “Venlonaer van ‘t Jaor” woorte. In detzelfde kader krege weej in 2010 de Fair Play Award van de gemeinte Venlo.

De Venlose Reddingsbrigade is op 1 november 1935 opgerich en haet momenteel ôngeviër 250 leeje. ‘t Jôngste lid is éín jaor ald terwiel ‘t aldste lid maar leefs 92 jaor is. Nao de sloop van ‘t zwumbad aan de Walstraot in Venlo  verhoésde de VRB nao ‘t zwumbad de Wisselslaag in Bliérick. ‘t Vereinigingslokaal leet naeve dit zwumbad. Miër informatie euver de Venlose Reddingsbrigade en Jocus is te vinde op www.venlosereddingsbrigade.nl en www.jocus.nl.