De Träöt 6×11 jaor: Ridder Kunibald
Dinsdaag 5 november 2013
In de rubriek De Träöt 66 jaor staon dees waek stil beej ziene hoésvader: Ridder Kunibald.
De echte figuur achter Ridder Kunibald blief altiéd umringk mit eine joeksige mistiek. De alleriërste belaefenisse van Ridder Kunibald laeze weej in de twiëde editie van De Träöt. Deze verschient vlak veur de Vastelaovend van 1949. Geistelik vader is Piet Stroeken, d’n toenmaolige directeur van Tante Bet. D’n teikenaer vanaaf daag 1 waas Piet Camps. De teikeninge brachte, zoëwie ontelbare teikeninge van Piet Camps, de verhaole van Ridder Kunibald tot laeve.
Nao Piet Stroeken ware de schriévers: Cor Deneer (haufredakteur beej Tante Bet, mei-oprichter van ‘t E3 Journaal en dichter), Piet Pollux (kastelein en buuttereedner), Bert Pollux en Hans Jacobs (liërkrach en schriéver).
Naeve zien belaefenisse in zien liéfblaad is Ridder Kunibald en truuk auk nog d’n haufpersoën in ein Vastelaovesleedje. In ‘t milliniumjaor 2000 winne Hay van den Ham en Frans Driessen Opus Jocus Leedjesaovend mit Ridder Kunibald. D’n téks wuurt geschreve door Wim Roeffen, Paul Naus en Frank Spreuwenberg. De meziék wuurt gekômponeerd door Wim Roeffen.
In ‘t leedje bezinge de zengers wie zeej Ridder Kunibald nao d’n optoch zoge gaon, maar det hae dao gaar neet toe kump umdet zienen hiep um in de staek luuët. Zoë kump ôzze Ridder Kunibald veur d’n daag wie det weej um kinne: eine gruëtse Ridder dae Venlo mit zien laeve bewaak, döks eine löbbes en veural eine joeksige falderappes.
Vaerderop in deze Kikerikiki vindt geej al ein niej verhaol van de Ridder Kunibald zelf. Auk in de nieje jubileum oétgave van De Träöt zal Ridder Kunibald neteurlik neet ontbraeke. Want: Kunibald, dao kump’hae weer. hae wet, weej zeen ‘m toch zoë gaer.
De 66e Träöt is te kaup vanaaf dinsdaag 18 fibberwari 2014. Miër euver vindt geej op ôs thoésblaad: http://www.jocusvenlo.nl/default.asp?De-Traot
Mit dank aan:
"Det is Venloos roem!", auteur Finbar van der Veen, ISBN 978-90-489-0010-7
“De Träöt 1948-1957”, auteur V.V.G. Jocus, ISBN 90-77579-03-6