De Träöt 66 jaor: iérste oétgave 1948
Beej gelaegenheid van de 66e editie van ôs Staatsorgaan De Träöt neemp de Kikerikiki ôg in zien kômmende edities mei truuk in d’n tiéd. Dees waek: de aller iérste editie van 1948.
De alleriérste editie van de Staatskrant van ‘t Jocus-riék woort oétgegaeve in november 1948. De krant telde veer blaajer en kôsde maar leefs 25 gölde-cente. Vlak veur Vastelaovend in 1949 wuurt al de twiëde editie oétgegaeve. ‘t Zoel geliék auk ‘t insigste sezoen zien waoin De Träöt twië kiér per jaor verschient.
De iérste oétgaves woorte gedrök op krantepepeer. Ansich net vraemp want De Träöt woort gemak door de Pers & Propaganda kemmissie waovan inkele leeje werkzaam ware beej Tante Bet. De verkaup verleep via ein mertkraom aan de Lômstraot. Later zoel hae auk nog hoes-aan-hoes bezörg waere.
Opmerkelik is det De Träöt redactie destiéds neet verwachde det De Träöt ein langk laeve beschaore waas, aldus ein kranteberich in Tante Bet. De Träöt is en bliéf ein Vastelaovesblaad. Naeve vuël schaele wazel, kos de laezer auk ein veurwaord van Vors Joeccius XI laeze. Aeve-as auk ein historisch verhäölke euver de vruugere Vastelaovesviering in Venlo en eine kort veuroétblik nao de Leedjesaovend en ein berich aan de waagebouwers. Neteurlik mochte ein aankodiging van ‘t Vastelaovesprogram en de Groëte Prônkzitting op 11 november neet ontbraeke.
De komplete iérste editie is heej truuk te laeze.
De nieje jubileum oétgave van De Träöt is te kaup vanaaf dinsdaag 18 fibberwari 2014.
Miér euver De Träöt luuës geej op ôs thoésblaad: http://www.jocusvenlo.nl/default.asp?De-Traot
Mit dank aan: “De Träöt 1948-1957”, auteur V.V.G. Jocus, ISBN 90-77579-03-6