De Träöt 66 jaor: de geteikende advertentie
Beej gelaegenheid van de 66e editie van ôs Staatsorgaan De Träöt neemp de Kikerikiki ôg dit sezoen mei truuk in d’n tiéd. Dees waek: de geteikende advertenties.
Al sinds zien beginjaore make de geteikende advertenties ein waezelik onderdeil oét van De Träöt. Neet allein zien de pecunia belangriék, auk gaeve de illustrasies ein joeksige oétstraoling aan ‘t Staatsorgaan van Jocus.
De advertenties doon veur ‘t iërs euren intree in De Träöt van 1949. Maar leefs 24 Venlose middestanders bringe middels ein illustratie eur baodschap aan de laezers euver. Illustrator Piet Camps woord gevraog um ein aantal geteikende beejdrages te levere.
Piet Camps greujde door de jaore oét tot d’n Hofteikenaer van Jocus. Neet allein teikende hae ontelbare advertenties. Onvergaetelik zien auk de vuële illustrasies en ontwerpe veur de diverse geluudsdragers zoëas door Jocus oétgegaeve. Zeej zien nog altiéd beeldbepaolend en karakteriserend veur de oétstraoling van De Träöt.
Door de jaore haer haet De Träöt zich mei aan d’n tiéd ôntwikkeld. Zoë greujde auk de advertenties. Iërs in formaot en in de modernen tiéd auk in kleur. Naeve Piet Camps hebbe door de jaore miërdere illustrators geteikende advertenties verzörg.
In 1998 teikende Leon Peeters veur kefee Old Dutch zien alleriërste advertentie veur De Träöt. Ein aantal jaore later woord Leon door Jocus gevraog um miër te gaon teikene. Nog ein aantal jaor later woord Leon door Piet Camps gevraog um beej Jocus P&P te kômme as zienen opvolger. Gans in zenen eige stiél teikend Leon in de geis van ziene veurganger.
Auk in de kômmende edisie hebbe de geteikende bedriéfsbaodschappe ein promintente plaats. Dit jaor op ein andere wiés as det geej gewind ziet. Heejmei waere veur De Träöt de advertenties in stiél doorgezatte en blief mit daodoor De Träöt wie De Träöt is: ‘t Staatsorgaan van Jocus mit vuël foto’s, joeksig niejs en de allerletste schaele wazel.
De nieje jubileum-oétgave van De Träöt is te kaup vanaaf dinsdaag 18 fibberwari 2014.
Miër euver De Träöt vindt geej op ôs thoésblaad: http://www.jocusvenlo.nl/default.asp?De-Traot