De Kwas is d’r klaor veur! Geej ouk?

Nao maonde van veurbereiding kump ‘t Boeremoosbal noow ech doën beej. ‘t Boerebroélofsgezelschap van Vastelaoves Gezelschap De Kwas is d’r hielemaol klaor veur.

In april van ‘t vurrig jaor woord eur de organisatie van de Venlose Boerebroélof in 2014 gegund door Vors Joeccius XI en ziene wiéze Raod van Elf. De rolle zien verdeild, de kleier gepas, de toere gemak en op 1 december jôngsleeje dörfde ‘t Broédspaar op eure prissentatie-aovend in de Venlonazaal ‘t maar al te gaer aan um zich te verlove. Op ‘t aanstaonde Boeremoosbal gaon zeej in ôndertrouw.

‘t Boerebroédspaar van 2014 is:

Evert, van Frits de moeleman in pepeer van de Toeperwaeg van Johann van euver de päöl en Nel van de gerdeneers oét de Looj. En van Ay, hoésflots van de Iésvogelstraot van Hay van de greunteveiling en An van d’n Krol oét Tegele.

en

Loes, van Piet de installateur in ‘t gashoés van de Mina Krusemanstraot oét Oeldre en van Ger en Merieke van de Meulehaof. En van Christien de bekker beej Jan Linders van Rienk en Lenie van der Wal van de lampe oét de Leechstad.

… oftewaal in ‘t dageliks laeve ouk waal bekind as Evert Schnock en Loes Peters.

ônder ‘t motto 5×11 jaor, det is De Kwas zien zeej mit ‘t ganse gezelschap klaor veur ‘t schoënste bal van gans ‘t jaor.
Alles euver ‘t Boerebroélofsgezelschap De Kwas vindt geej op www.boerebroelof.nl