De femilie Stiefel op de Leedjesaovend
Zondaag 29 september 2013
Zondaagmorge veur daag ein dauw hông Hèn al aan d’n tillefoon. Hae waas gans boéte aom: "Groëte kônsternatie zaoterdaagaovend! ôs kaegelclub De Waerse Hompelpoët had zich begaajd mit de leedjesaovend. ‘t Waas ein kwante bedoeling wiés aan leedje 11… Beej d’n oétslaag ware de manne ‘t zoë käök det ze de vrouwluuj haos aanvlooge." Marleen en Sies zoote ‘t op scherp: “Geej manne? ‘t Is gedaon mit ôg deze Vastelaovend Geej op tiéd nao hoés en weej bliéve wiés de late eurkes plekke. Dan zweije weej intellik de scèpter!” Gelökkig had Jaer ‘t tot rös kinne bringe. As de vrouwluuj deze Vastelaovend maar neet door de waeld gestaoke waere.
Efeng, weej hebbe ôs zaoterdaag köstelik geammesseerd in de Maaspoort. Waat waas ‘t kwant wèh? Handrie en Lieske hadde zich haos in de haor. Mien Meriet is d’r maar tösse gekraope: “Noow straevel ôg neet zoë. Weej zien neet thoés! En kom neet aan mien krölle, want weej kômme op d’n tillevisie.” "Jao, mam ‘t is al good. Maak dich maar gen dieke bein. Waegwiézer Wiellie kump dich ech niks vraoge huur." moetsde Lieske.
Waat ware de blaage Sjraar en Juul weer kwant wèh? Zeej hadde ôzze Vors moei beej de puuët, neet? “Harry, bisse klaor mit praote? Dan kinne weej beginne…” ‘t Zoel mich niks verwondere as die twië kowbojs ‘t taege ‘t Hofbal van ôzze Vors hebbe euvergenaome. D’n hiér Bert had eur wäörd schoën oét d’n aek gedreijd.
Gans Holland haet ‘t kinne volge. D’r woort zoëvuël getjielp det de musse d’r heis van woorte. En waat ein leedjes! Weej hebbe ôs gestraeveld wae we op ‘t kaertje meuste zette. Ik heb zondaag mit bedraag nao de herhaoling op d’n umroop zitte kiéke. ôzze Lex had d’r auk schik in. As hae neet oét kiék, kump hae strakkes same mit Sjraar en Juul in Hollywood oét. Let op waat ik ôg smoés!
De stad haet in idders geval weer eine gas schoën leedjes gekrege. Dao kinne we mei veur d’n daag kômme. Ik spits mich al op ‘t naojaor. Iérs de naojaorskermis in oktober. Dit jaor steit die auk beej ôs in de straot. Daonao kroépe we al weer vlot nao elf van elf. Ik heb gehuurd det die van de Jocus ein Prinses gaon kriége. Ik ving zoëwaat op zaoterdaag, aevel net te weinig um ‘t gans mei te kriége. Die hebbe nog waat in ‘t vaat zitte, let op mien wäörd…
Aevel noow gaon ik mich ièrs ein indje vertraeje. Vanaovend is d’r weer toeptoernooi beej die van Wolters. De veurige kiér is det oét de hand gelaupe. Sjennet begôs mit grei te goëje wie ik ‘m mit twië blind op zien vot tikde.
De groete aan de vrouw en de kinder ein paar neut.
Wies ‘t weer ens is.
Waas geteikend,
Stuf Stieffel