D’n Opstaeker 2015 ein ôntwerp van Hay Smeets

Beeldhouwer Hay Smeets haet veur de kômmende Vastelaovend "d’n Opstaeker^TM 2015" ôntworpe. Names de Wortelepin haet veurzitter Rien Meijer dit jaor de iér um eine kunstenaer veur te drage oét naam van alle viéf de stadsdeilvereiniginge. D’n hiër Smeets reageerde verras. "Ik vind ‘t biezônder um de iër te kriége um d’n elfde Opstaeker te meuge ôntwerpe", zaet Smeets. "Ik kan zegge det ik hiël wat middage heb bestaejd um ein aantal ôntwerpe te make".

Oétintelik haet de jury, die besteit oét ein aafvaardiging van Jocus, de Wortelepin, d’n Oeles, de Belhamels en de Keieschiéters, éín winnend ôntwerp gekaoze. Ein kloonsgezich mit ein trôm mit drumstekke die ein elf symbolisere.

D’n Opstaeker^TM is ein saort broche die steit veur ein dreejtal zake: ein bliék van waardering veur de vuule vreejwilligers die allerlei Vastelaovesactiviteite organisere in de stasdsdeile Venlo Blierick, Tegele, Belfeld en Arce en Velde; ein bliék van betrokkeheid mit de vastelaovend en eine financiële opstaeker veur alle vastelaovesvereiniginge in deze regio. De viéf stasdsdeilvereiniginge van de gemeinte Venlo haope det de inwoëners, net as verleeje jaor, weer massaal dees vastelaovesbroche zulle koupe um zoë de verschillende vastelaovesactiviteite van de divere vereiniginge te ôndersteune.

Hay Smeets is op 9 jannewari 1934 gebaore in Venlo. Hae haet vruuger ein aannemersbedriéf gehad en is later begônne mit La Vita Sana, ein sportschoël in Blierick, die noow door zien tweë zeuns wuurt gerund. "Eigelik heb ik noeit tiéd gehad veur ‘t make van beelde maar ôngeviër tiën jaor geleeje bin ik begônne mit eine cursus beeldhouwe beej Hans Reijnders". Noow is Smeets haos iddere middaag te vinde in zien blokhut in d’n haof, wao hae veural beelde oét marmer mak. Daobeej schildert hae ouk. Volges zien vrouw haet ‘t artistieke altiéd in eure man gezaete maar door zien werk waas d’r noeit tiéd veur. "Hae vônd ‘t vruuger altiéd fijn um verschillende musea te bezeuke. Det doon weej nog altiéd," aldus zien vrouw. Smeets is d’r gruuëts op det hae d’n elfde Opstaeker^TM haet meuge ôntwerpe. Hae en zien vrouw staon mit vastelaovend neet miër op de taofels, "maar weej kinne d’r zoë van geneete as d’r tiédes d’n optoch ein moeie groep of wage veurbeejkump."                                                                 

D’n Opstaeker^TM 2015 zal op d’n Elfde van d’n Elfde waere geprissenteerd. Vanaaf daen datum is hae ouk te koup beej de verschillende vastelaovesvereiniginge en tiédes de verschillende vastelaovesactiviteite.