D’n Opstaeker 2014: ein ôntwerp van Leon Peeters
Kunsschilder en illustrator Leon Peeters haet veur de kômmende vastelaovend ‘D’n Opstaeker 2014’ ôntworpe. Names Jocus had veurzitter Harry Pouwels dit jaor de iër um eine kunstenaer veur te drage oét naam van alle viéf de stadsdeilvereiniginge. Peeters reageerde metein enthousias. “Ik had heej gaar neet op geraekend. Ik vind ‘t erg leuk det me mich haet gevraog um ‘t ôntwerp te bedinke”, zaet Peeters. “Ik bin d’r einen daag veur gaon zitte en eigelik had ik al flot ein zestal schetse klaor.”
Jocus, de Wortelepin, d’n Oeles, de Belhamels en de Keieschiéters ware einsgezind euver ‘t definitieve ôntwerp, ein dansmarietje. “Ik waas aan ‘t zeuke nao iets waat ôs bind as ‘t um vastelaovend geit. Iddere vereiniging in Venlo haet ein aantal dansmarietjes beej ‘t gezelschap. Dus woel ik dit oétbeelde in ‘t ôntwerp”, zaet Peeters. “De viéf vingers aan zien hand, in vastelaovesgroet, beelde de viéf stadsdeile van Venlo oét. Ouk de Maas is einen bindende factor, daorum de golve”.
"D’n Opstaeker" is ein saort broche die steit veur ein dreejtal zake; ein bliék van waardering veur de vuúle vreejwilligers die allerlei vastelaovesactiviteite organisere in Stadsdeile Venlo, Bliérick, Tegele, Belfeld en Aarce en Velde; ein bliék van betrokkeheid mit de ‘vastelaovend’en eine financiëlen opstaeker veur alle carnavalsvereiniginge in de regio. De viéf stadsdeilvereiniginge van de gemeinte Venlo haope det de inwoëners, net as vurrig jaor, weer massaaal dees vastelaovesbroche zulle koupe um daomei de vastelaovesactiviteite van de diverse vereiniginge te ôndersteune.
Leon Peeters is op 30 juni 1965 in Venlo gebaore. “Ik heb altiéd vuúl geteikend maar ik heb noeit ein opleiding gevolg. Ik bin ech autodidact”. Nao zien middelbare schoël die hae afsloot mit ein diploma atheneum, is Peeters gaon werke. Aaf en toe schilderde hae waal ens iets veur vrinde en door mônd tot mônd reclame woord ‘t alsmaar miër. Op ein bepaold moment meus hae keeze tösse zienen baas of veur zichzelf beginne. “Ik bin noow 17 jaor professioneel kunsschilder en illustrator. Ik maak moor- en plefônschilderinge, schilderië en portrette en ik decoreer.” Bezeukers van horecagelaegehede in Venlo en umgaeving kinne dök werk van Peeters taegekômme. “In vuúl kefee’s heb ik moorschilderinge gemak.” Vuúl minse zulle Peeters kinne van zien Jocus Vastelaovesposters en zien illustrasies in de Träöt, ‘t staatsorgaan van Jocus. “Zes jaor geleeje vroog Piet Camps, dé Venlose illustrator, aan mich of ik zien taak binne Jocus langksaam woel gaon euverneme. Dao bin ik erg gruuëts op. Ik probeer te werke in zien traditie, maar mit miene stiel.”
Miër info euver Leon Peeters is te vinde op www.plafondschilderingen.nl
Veur vaerdere informatie kint geej terech beej de veurzitter van de Kemissie Pers en Propaganda: d’n hiër Joep Schouren, pp@jocus.nl.