D’n Opstaeker 2012

De Belvendse kunstenaer Har van der Linden haet veur de kômmende vastelaovend "d’n Opstaeker 2012" ontworpe. Names CV de Belhamels oét Belvend had veurzitter Bert Nabben dit jaor de iër um ‘n kunstenaer veur te drage oét naam van alle viéf de stadsdeilvereiniginge. Veur Van de Linden waas ‘t ‘n groëte verrassing det de veurzitter van de Belhamels um vroog. "Ik vind ‘t ‘n groëte iër um veur alle vastelaovesvierders in de gemeinte Venlo d’n Opstaeker te meuge ontwerpe. Dao bin ik hiël erg gruuëts op", zaet Van der Linden. "Ik bin dezelfde aovend begôs mit ‘n aantal ontwerpe. Daonao ben ik de schetse gaon oétwerke. In totaal heb ik d’r viéf gemak".

Oétintelik hebbe Jocus, de Wortelepin, d’n Oeles, de Belhamels en de Keieschiéters unaniem gekaoze veur ein ontwerp. "Dat zoel ik zelf auk gekaoze hebbe", zaet Van der Linden gruuëts. "’t Is ‘n vrolijke "vastelaoves-snoét" dae opgebouwd is oét de beginletters van de viéf stadsdeile van de gemeinte Venlo en symboliseert de samewerking tösse de viéf stadsdeilvereiniginge. De figuur lach veur inkele daag alle zörg weg. Hae viert vastelaovend zoë wië ‘t huurt, mit vuul "joeks en jen", um daonao de hectiek en stress van alle daag te kinne trotsere", alzoë de Belvendse schilder.

Miër informasie euver Har van der Linden is te vinde op www.harvanderlinden.nl.