D’n Opstaeker 2010

De Bliërickse kunstenares Gerda van der Sterren haet veur de kômmende vastelaovend D’n Opstaeker ontwôrpe. Oét ‘n aantal ideeje hebbe Jocus, De Wortelepin, d’n Oeles en De Belhamels ‘t oétintelikke ontwerp gekaoze. ‘t Is ‘n brök mit 5 ballonne. De letste ballon stelt de gemeinte Arce en Velde veur mit de dorpskern Lomm die richting Venlo kômme.

D’n Opstaeker is ‘n soort broche dae steit veur ‘n dreejtal zake: ‘n bliek van waardering veur de vuule vreejwilligers die allerlei vastelaovesaktiviteite organisere in Venlo, Bliërick, Tegele en Belvend; ‘n bliek van betrokkeheid mit de vastelaovend en ‘n financiële opstaeker veur de vastelaovesvereiniginge. De veer stadsdeilvereiniginge van de gemeinte Venlo haope det de inwoëners, net als veurgaonde jaore, weer massaal dees vastelaovesbroche zulle kaupe um daomei de vastelaovesaktiviteiten van de diverse vereinige te ondersteune.

Gerda van der Sterren druuëg de vastelaovend ‘n werm hert toe. ”t Is ein uuting van kreativiteit op allerlei gebiede’. De Bliërickse aquarelliste, det jaorelangk veur de klas haet gestaon, is min of miër autodidact. ‘Ik heb altied geschilderd en netuurlik heb ik verschillende cursusse gehad. As ik ‘n opdrach krieg, laef ik mich in ‘n bepaolde situasie hielemaol in’. De Bliërickse kunstenares schildert zoëwaal abstrak as netuurgetrouw.