‘Dit wuurt weer aovendvöllend’ vermaak’, schreef Jan van Dijk (neet de ald-trainer van VVV, einen andere Jan van Dijk) lets. Jan haet d’r kiék op: ‘t berich van Umroop Venlo euver de priesverhuuëging van ’t Venlonaerke (van € 2,60 euro in 2020 nao € 3,20) ôntlokde op Facebook in mum van tiéd diek hônderzestig reaksies. Gen verrassing veur kinners wie ôzze Jan.

Näöle euver de priés van ’t Venlonaerke is net zô’n oër-Venlose tradisie wie Prinseraoje, Allerkinder en weigere nao de Koel te gaon as VVV in de middemoot van de Iërste Divisie schravelt, maar waal gedrapeerd mit eine gael-zwarte sjaal duchtig de nek wasse en geëmotioneerd “Avé VVV” meizinge as ôs kroétclub op ’t bordes van ’t Stadhoés weer ens ein promosie nao de Eredivisie viert.

“Dich môs haos einen hypotheek aafsloéte veur ein glaas beer”, bewees eine näöler de stiélfiguur ‘euverdriéve’ perfek onder de kneen te hebbe. “Veur de priés van dreej klep kriégse ein ganse krat in de supermert’, klaagde eine stamgas van Kefeej Aldi. En neteurlik is d’r auk altiéd eine dae Є 3,20 geit umraekene nao göldes. Want, en det wis geej messchiens nog neet, vruuger waas alles vuuël baeter.

Waat zeg ik? Wie mien vader nog eine bôksebaom waas, bestelde miene opa tösse ’t dreejbande door aan ’t buffet zô’n toét beer veur ein döbbeltje.

Luuster, en noow weer serieus: nemand steit te juiche um dae nieje priés. Geluif mich, auk heej greuit genne geldbaum in d’n haof.

Aan d’n andere kant, waat is d’r gebeurd mit stilstaon beej gratis evenemente die toch örges van geschoek môtte waere? Waat is d’r gebeurd mit de solidariteit mit ôs horecaondernemers die haopelik net weer baove Jan zien nao corona en noow, net wie idderein, mit gigantisch stijgende koste te make hebbe? Daonaeve, gaon die beroepsnäölers op Facebook straks auk moord en brand schriëve wanniër eure vakbond vanwaege de greujende inflasie in de nieje CAO viéftiën procent salarisverhuuëging geit eise? Is det dan auk ‘vuuël te vuuël’?

Jao, leef luuj, ein klep is deurder gewaore. Alles is deurder gewaore. Hoewaal, waat zeg ik, neet alles neteurlik. Maar nae! Inflasie haet nog noëits vat gehad op joeks. Joeks kos nog net zoëvuuël wie in 2020: lau!

Profiteer d’r van:
Vastelaovend same!