Bram Holla nieje sirremoniemeister

Bram Holla (1978) wuurt de nieje sirremoniemeister van Venloosch Vastelaoves Gezelschap Jocus in  Venlo. Bram volg Pascal Vaes op dae dees functie 3 jaor vervölde. Bram is getrouwd mit Maud en werk as liéraar op ‘t Blariacum College.

In de vastelaoveswaereld is Bram gennen ônbekinde. Hae vormp, same mit Ruud Stikkelbroeck, al 10 jaor ‘t in hiël Limburg bekinde duo “Bram en Ruud”. Beej eur debuut tiédes de Jocus Leedjesaovend in 2002 beklômme zeej mit eur leedje “’t Optochleed”metein ‘t hoëgste podium in Venlo. In 2008 woorte zeej mit “De kriebels”winnaer van ‘t LVK. Naeve ‘t zinge is Bram ouk bekind van diverse rolle in de Venlose revue en as Baer de Woers in Café Chantant.

ônlangs goove Bram en Ruud te kinne um, nao haos 11 jaor, nao dit seizoen as zingduo te stoppe.

‘t Bestuur van Jocus zal Holla op 5 november tiédes de Raodsvergadering officieel welkôm heite en waere de agenda’s veur de kômmende maonde naevenein gelag.

‘t Iërste publieke optraeje as sirremoniemeister zal tiédes de prônkzitting zien op 17 november a.s., ‘t letste optraeje van Bram en Ruud is op 10 fibberwarie 2013.