Bram en Ruud; veerde LVK-finale mit ’33 Daag’

‘t Venloos duo Bram en Ruud steit kômmende vriédag veur de veerde kiër in de finale van ‘t Limburgs Vastelaovesleedjes Konkoer mit eur leed ’33 Daag’. Zoëas weej gehuúrd hebbe zulle de twië vanaaf Venlo mit de fiets nao de Jo Gerrishal in Swalme vertrekke. De vurrige dreej finaleplaatse ware in 2003, 2008 en 2010, waobeej 2008 netuurlik hiël memorabel is vanwaege de iërste plaats mit ‘t nummer ‘Kriebels’.

De LVK-finale van 2013 is tegeliékertiéd ouk de letste kiër det ‘t duo as “Bram en Ruud” zal deilneme aan ‘t LVK umdet de twië Venlose ‘vastelaoveszengers’ hebbe aangekôndig nao dit carnavalsseizoen te zulle stoppe. ‘t Dook velt naodet elf jaor geleeje eur carrière opens begôs. Frans Pollux schreef veur eur ‘t leedje ‘optochleed’ en prômp wônne ze Jocus leedjesaovend en indigde ze op de derde plek van ‘t LVK van 2003.

Bram en Ruud zien hiël erg blie mit eur finaleplek. “’t Is hiël erg moei det we nog éíne kiër meuge knalle op dit Limburgs podium”, aldus de twië Venlonaere. ‘t  Nummer ’33 Daag’ geit euver ‘t feit det taegeswaordig de vastelaovend vuuël langer deurt as de oorsprônkelikke 33 daag. ‘t Venloos duo, det mit deze vastelaovesschlager derde woord op Jocus’ Leedjesaovend haet ein hiël good geveul. “We hebbe gemerk det de minse in de café’s en in de feeszale enthousias op ’33 Daag’ reagere.” Ein leuk detail is det Bram en Ruud in 2007 mit ‘Kriebels’ ouk op ein derde plek indigde beej Jocus waonao ze oétintelik winnaer woorte van ‘t LVK. Wae wet waat veur moeis d’r nog in ‘t verschiet leet veur dit illustere duo.

Tiedes de oétzending op vriedaag 1 fibberwari 2013 (live op L1 tillevisie) kint geej stumme op Bram en Ruud via SMS. Kiék op http://www.stichtinglvk.nl/sms.html veur miër instruksies.