Book euver de geschiedenis van de Venlose Boérebroélof

Volgend jaor is ‘t 100 jaor geleeje det in Venlo de iërste georganiseerde Boérebroélof plaatsvond. In 1912 woort heej veur ‘t iërs melding van gemak. In ‘t kader heejvan zien Toine Schreinemachers en Paul Seelen op zeuk nao moëie verhaole, leuke anekdotes of biezondere gebeurtenisse die gaon euver de Venlose Boérebroélof. Maar auk zeuke ze nao minse die miër informasie kinne gaeve euver de beginjaore van dees moëie Venlose tradisie. Minse kinne zich melde via info@jocus.nl.

Tiedes de Vastelaovend wuurt de waereld op de kop gezatte. De vastelaovesgekke neme dreej daag lang de mach euver van de notabele. In dit kader is waarschienlijk auk de Boérebroélof ontstaon. De boere, vruuger ein van de liëgste sociale range, zien dae daag de baas. Ze viere dit mit ‘n broélof, as teike van vruchbaarheid en ‘n niej begin.

In 1912 trok de iërste georganiseerde Boérebroélof door de straote van Venlo. Waarschienlijk op ‘n andere daag as de vastelaovesdinsdaag. In de begin jaore waas Jocus namelijk neet aktief maar de Boérebroélof vieringen ginge in Venlo gewoën door. In 1938 ontwaakte Jocus en organiseerde zelf de Venlose Boérebroélof. Vanaaf dae tied wuurt deze moëie Venlose tradisie onder Jocus’ vaan geïnitieerd.