Boeremoospaote FCV

Zondaag 19 july 2009

Voetbalvereiniging FCV organiseert in ’t kader van eur 7 x 11 jäörig bestaon in 2010 de Venlose Boérebroélof. Hai van Rensen en José Thijssen-Linders vorme ’t boérebroédspaar det vastelaovesdinsdaag in de onech zal waere verbonde.  Wao vuul Venlonaere inmiddels bezig zien mit vekansieplanne, dreijt ’t beej FCV al volop um de Vastelaovend en in ’t biezonder um de Boerebroélof. Aafgelaupe zondaag 12 juli haet ’t zoëgenuemde ´Boeremoospaote´ plaatsgevonde. In optoch trok ’t voltallige gezelschap vanaaf sportpark Arenborg nao de ‘boerehaof’ aan de Ald Goltewaeg in ’t Ven um dao de jonge koëlplentjes te paote. Vanzelfspraekend woorte de iërste plentjes leefdevol in de grond gezatte door ’t aanstaonde broédspaar, waonao de res van ’t kleine gezelschap volgde.

De moëi aangelagde ´boerehaof´ is herkinbaar aan ’t logo van FCV, det prominent zichbaar is vanaaf de Weselsewaeg, kômmende vanaaf ’t Europaplein.

Vriedaag 27 november 2009 vindt de offisjele prissentasieaovend plaats in de Venlonazaal aan de Hoëgewaeg in Venlo.