OETVERKOCH: Boeremoosbal, dich kumps toch auk?

Op dit grutste vastelaovesbal luuët, wie altiéd, ’t Boerebroélofsgezelschap van ’t veurig jaor, eur “kiendje” kiéke. Heejnao neemp ’t gezelschap aafscheid en neme ein nieje taak op zich, die van Ermen Tak.

Daomei make zeej de buun vreej veur ’t nieje Boérebroélofsgezelschap, die zichzelf aan de verzamelde boére en boérinne veurstelle. De zaal is aangekleid mit passende landbouwprodukte en de gaste gaon allemaol gekleid in eur beste boerekleid of pak.

In 2019 is ‘t de personiëlsvereiniging van Benders supermerte die ons schoëne Boérebroelof geit organisere: onder de naam “De Koedeljach van Benders”.
Optraejes zien d’r van de 4 winnende Jocusleedjes, Jocus Hofkepel, Van Gelder, Joekskepel d’n Heiten Haspel, Sef Derckx en Jos Deenen, en Linke Mik.

D’n Boeremoosbal 2019 is hiélemaol oétverkoch.