Boeremoosbal, Krense en Naopraote
De kersbuim zien weer opgeruump en det beteikent det Venlo zich geit opmake veur de vastelaovend. ‘t Boeremoosbal, zaoterdaag 17 jannewari, is ein van de iërste evenemente van dit volksfees. Raeje um te kiéke wie ‘t is beej de 80-jäörige Venlose Reddingsbrigade, want zeej levere ‘t kersverse broédspaar, Debbie Geraads en Kevin Herpers, det vastelaovesdinsdaag op ‘t Venlose stadhoés in “d’n ônech” geit trouwe.
Tiedes ein van de letste repetitieaovende oefent ‘t klein gezelschap van de VRB enthousias. “We hebbe mit zien alle keihard gewerk”, zaet Dennis Loosveld van de pers en promotie van de VRB. “Wie we in mei 2014 te huúre krege det weej de iér krege um dit Venlose volksfees ter meuge organisere, zien we metein enthousias aan de slaag gegaon. ‘t Meiste werk zit d’r op. Noow môtte allein nog de puntjes op de i gezatte waere”. Binnekort wuurt ‘t boeremoos geougs op ‘t terrein naeve ‘t clubhoés in Blierick. “t Stökske land is tiédelik ‘Jocusriék’ maar wuurt nao dinsdaag 17 fibberwari weer truukgegaeve aan de Wortelepin”, lach Loosveld.
De broédegôm
Volges Broédegôm Kevin Herpers is hae haos idderen daag bezig mit de Boerebroélof. “D’r is door de verschillende kemissies moei werk aafgeleverd. De P&P zörg veur de boerekrant dae binnekort hoés-aan-hoés door Venlo verspreid wuurt. De kleijingkemissie haet gezörg det weej d’r de kômmende waeke op en top oétzeen”. Kômmend boeremoosbal prissenteert ‘t gezelschap van de Venlose Reddingsbrigade zich veur ‘t iërs aan ‘t Venlose publiek. Daonao volge nog zô’n 27 optraejes door gans de gemeinte Venlo en zelfs in Sevenum, wies Debbie en Kevin zich in ‘d’n ônech’ laote verbinde op ‘t Venlose Stadhoés op dinsdaag 17 fibberwari.
De Broéd
Debbie Geraads vind ‘t ein hiël groëte iër um broéd te zien tiédes de Venlose Boerebroélof. “De kriegs as Venloos maedje neet zoëmaar de meugelikheid um Venlose Broéd te zien. Ik heb dees kans dan ouk mit allebei de hand aangegreepe en ik bin d’r hiël gruuëts op”. ‘t Gezelschap besteit oét ein klein gezelschap van 27 persoëne, wao ônder einen drenkeling en eine kapitein en ein groët gezelschap van ôngeviër 80 minse. “Vaerder hebbe we eine vrouwelikke börgemeister, Linda Faassen, en sirremoniemeister, Daisy van Mosseveld. Tiédes de repetitie bleek det de sirremoniemeister neet op eur mundje is gevalle. “Ik doon alles oét de kop”, zaet ze. “Det is gunstig veur de spontaniteit”.
Tiédes ‘t boeremoosbal traeje nao ‘t tradisjonele ‘Holadiejeja’ aafwisselend op de Hofkepel en Wahnsinn. In de foyer kinne minse zich laote fotografere in einen echte reddingsboët en is d’r ein vastelaoves-dj en in de Luif zörge de Heiten Haspel en de Mootwörm veur de juuste stumming. D’r zien nog kaarte te koup aan de kassa van de Maaspoort in Venlo of beej de bekinde verkoupadresse, Sporthuis Olympia (Jan Klein), Plus Benders, Slagerij Schreinemachers, V.V.V.-kantoër (in boekhandel Koops) en Blokker (in Winkelcentrum ‘t Tref). Kaarte veur ‘t Boeremoosbal koste € 11,00. Ouk zien d’r kaarte te koup veur de Kôffietuiterie op dinsdaag 17 fibberwari. Dees koste € 12,50. Kaarte zien ouk te koup via de webshop van Jocus.
Krense en Naopraote
Op zôndaag 18 jannewarie begint om 12.30 oor ‘t traditionele Krense, de resepsie van ‘t boerebroélofsgezelschap van de VRB, vanaaf 14.30 oor gevolg door ‘t Naopraote. Ein van de houfacts is de Venlose dialectband de Drekskaters. De Venlose band, opgerich in 1982, speult veurnamelijk rock and roll, Jazz en soul. Daonaeve is d’r ‘n optraeje van ‘Nag naat achter de oére’ oét Horst. Netuurlik zal ‘t nieje boerebroélofsgezelschap van de Venlose Reddingsbrigade, mit in eur midde ‘t broédspaar Debbie Geraads en Kevin Herpers, zich aan ‘t publiek prissentere. Ouk is d’r niej talent. Zoë zulle de Herfshane weer van de partie zien, aeve as de winnaers van ‘t Jocus Jeug Leedjes Konkoer. Netuurlik kint ‘t publiek weer geneete van de veer winnende Jocusleedjes. De muzikale umliesting is in hand van de Prinsekepel van Jocus.