Venloosch Vastelaoves Gezelschap Jocus mak gruuëts bekind det de organisatie van de Boerebroélof 2027 wuurt gegund aan de meiwerkers van Canon Production Printing oét Venlo. 

Beej gelaegeheid van eur 150-jäörig jubileum, haet eine enthausiaste groep meiwerkers ’t initiatief genaome um as oer-Venloos bedriéf – en taegeswaordigs waereldspeuler in produktie printe – de Venlose Boerebroélof 2027 te gaon organisere.

Via d’n appethiëk van Lodewijk van der Grinten in de Steinstraot in hertje Venlo greujde vanaaf 1877 ein bedriéf oét tot eine waereldspeuler in professioneel produktie printe: Canon Production Printing. Generaties Venlonaere en minse van boéte Venlo hebbe d’r gewerk. ’t Groëte enthausiasme det d’r noow is um de Venlose Boerebroélof te organisere tuuënt de sterke verbôndeheid mit de költuur en de stad wao ’t allemaol begôs.