Boerebroélof 2025 gegund aan Stichting Herfshane

Op de Raodsvergadering van maondaag 8 april haet de Raod van Elf beslaote um de organisatie van de Boerebroélof 2025 te gunne aan de Stichting Herfshane. Daomei kriég de jeug volop de ruumte beej ’t viere van ein van de aldste (en volges vuuël minse de schoeënste) Venlose vastelaovestradisies. 

Stichting Herfshane guuf al jaorelangk jôngk talent oét de regio Venlo ein kans um zich te ontwikkele op ‘t gebied van ‘t schriéve van leedjes en componere van meziék. Zoe wie altiéd wuurt gezag is vastelaovend ’t fees van riék en erm en jôngk en ald. De Herfshane zien sinds jaor en daag neet mier weg te dinke in ’t viere van de Venlose vastelaovend en ’t betrekke van nieje generasies beej ’t meis joeksige feest van ’t jaor. Mit ’t organisere van de Boerebroélof gaon De Herfshane noow klank en kleur gaeve aan de vastelaovesdinsdaag in Venlo en wuurt de Boerebroélof doorgegaeve aan de volgende generasie. 

Det mak det ‘t bestuur van Venloosch Vastelaoves Gezelschap Jocus unaniem haet beslaote mit de Vastelaovend van 2025 Stichting De Herfshane de iër te gunne um de Venlose Boerebroélof te organisere.