Bekindmaking Boerebroelofsgezelschap

Op 21 mei 2013 haet VG De Kwas de rolverdeiling veur ‘t Boerebroelofsgezelschap 2014 bekind gemak. In 2014  viert VG de Kwas, ‘t aldste buurtgerichte vastelaovesgezelschap eur 5 x 11 jäörig jubileum. Genne Jubileum-Prins maar ein Jubileum Boerebroelofsgezelschap. Dét waas de wins van VG de Kwas en dae wins is in vervölling gegaon.

In april is in de Raodsvergadering  van Jocus de kandidatuur veur ‘t Boerebroelofsgezelschap 2014 bespraoke, waobeej de keuze veel op VG de Kwas die heejmei ‘t hônderdentwieëde Boerebroelofsgezelschap van Venlo wuuërd.  Zeej volge ‘t gezelschap van VieCurieus op die kómmend jaor as Ermen Tak door ‘t boerelaeve zal gaon.

Aafgeloupe dinsdaag woort in feeszaal ‘t Tref aan de Hendrikxstraot in Venlo-Zuid bekind gemak wae op 4 maart 2014 in d’n onech zal waere verbónde. Loes Peters, lid van de Jeugkemissie en Evert Schnock, veurzitter van de Pers en Propogandakemissie zien de oétverkorene en zulle zich ‘t jao-waord gaeve. Op ‘t bordes van ‘t stadhoes zulle Loes en Evert, in ut beejzien van femilie, getuuge, börgemeister, bode en genuuédigde, met ein in d’n onech waere verbonde.

Miër informasie euver ‘t Boerebroelofsgezelschap van De Kwas kint geej truukvinde via www.boerebroelof.nl.