Nao 14 jaor zien rol op joeksige wies te hebbe vervöld, haet Bram Holla (1978) aangegaeve det de vastelaovend 2026 zien letste jaor zal zien as Sirremoniemeister van Venloosch Vastelaoves Gezelschap Jocus. Vanaaf Elf van Elf geit Bram nog éín sezoen mit ‘de bel’ veurop um daonao zien rol door te gaeve aan ziene opvolger.

De Raod van Elf van Jocus is gruuëts um Baer Hendrix (1982) veur te stelle as d’n beaug nieje Sirremoniemeister van Jocus. Baer is neet allein lid van Jocus Joeks kemissie en vastelaoveszenger, maar haet de vastelaovend mit paplaepel ingegaeve gekrege.

As zoon van einen ald-Vors en ein veurmaolig Dansmerieke viert al van kinds aaf aan vastelaovend.
Hae is 11 jaor getrouwd mit Cindy en same gruuëtse elders van Flynn en Emma. In ’t dageliks laeve is Baer werkzaam as Stadsdeilmanager beej de Gemeinte Venlo.

As lid van Jocus Joekskemissie verzörg hae onder andere de prissentatie van Elf van Elf, Matinee Musicale en d’n Boeredinsdaag op de Mert. Venlo haet Baer auk liëre kinne as vastelaoveszenger van ’t dreejspan
Baer, Lei & Ron mit Dao zit ein gaetje in (2e priës Opus Jocus 2024) en Pierewaaje (4e priës Opus Jocus 2025). Auk sportief steit hae zien menke as aktief lid van FCV Venlo.

Alzoë kump alles same: joeks, ein groët vastelaoveshert en ein werme persuuënlikheid make Baer Hendrix eine gedruimde beaug opvolger veur dees iërvolle functie binne de Venlose vastelaovend.

De wisseling van de wach zal bekrachtig waere op de Algemeine Leejevergadering op 14 september 2026 en ‘t iërste publieke optraeje as Sirremoniemeister zal Baer belaeve op 11 november 2026.