As Jocushaan weer kreit

‘t Vastelaovesleedje “As Jocushaan weer kreit” is aafgelaupe zaoterdaag in ‘n verniejde bomvolle Maaspoort gekaoze as nieje Venlose vastelaovesschlager van ‘t kômmende seizoen. ‘t Nummer is geschreve door Ruud Bettinger en Paul Lenders en wuurt gezônge door Hay Smeets.

Hay kin zien gelök neet op. “Wie ik ‘t nummer veur ‘t iërs hoort, wis ik metein det dit ‘n hiël good leed is.” Hay Smeets dae al twië kiër iërder de Leedjesaovoed van Jocus won (1994 en 1996) veulde det d’r auk dit jaor iets moëis kôs gebeure. “Ik merkde det de zaal geliek enthousias op ‘t nummer reageerde en det waas ‘n heerlijk geveul”. Auk de schriévers van de schlager, Paul Lenders en Ruud Bettinger, merkde det ‘t vönkske euversprong nao de zaal. “Asse zuus det de ganse zaal geit staon, realiseerse dich inens det dit waal ens de nummer ein kin waere”, alzoë Bettinger. Volgens Lenders is einvoud de krach van ‘t leedje. “We hebbe geprobeerd um truuk te gaon nao de basis, neet al te moeilijk, ‘n leed waat geliek blief hange en Hay kin dit geweldig neerzette”. De twië komponiste schriéve al 27 jaor vastelaovesleedjes mit vuul sukses. Maar leefs 5 kiër stond ‘n leedje van eur in de finale van ‘t LVK.

Dit jaor kriege alle elf finaliste ‘n plekske op de nieje Jocus CD, dae vanaaf 11 november in de winkels leet. De 4 winnende leedjes hielemaol en de andere zeven nummers in de vorm van ‘n medley. Det haet alles te make mit ‘t verlate tiedstip van de Leedjesaovend, door de verbouwing van de Maaspoort.