äöpening niej Jocuspand
Vriedag 4 fibberwari wuurt ‘t Jocuspand aan de Börgemeister Conraetzstraot 76 offisjieel geäöpend. De Stichting Vrinde van Jocus zal ‘t ziër ruume bedriéfspand euverdrage aan Jocus. Det gebeurt door ‘t onderteikene van ‘n euvereinkôms door Jan Simons, veurzitter van de stichting, en Harry Pouwels, veurzitter en Vors van Jocus. Um de euverdrach krach beej te zette zal Börgervader Bruls, beschermhiër van Jocus, ‘nnen haan ônthölle aan de gaevel van ‘t pand. De middaag begint um 17 oor, ‘t korte offisjieele gedeilte begint um 17.30 oor.
De verhoézing waas noodzakelijk umdet Jocus ‘t pand aan de Maaskaai môt verlaote as gevolg van ‘n andere invölling dae de gemeinte Venlo aan dees lokasie wilt gaeve. De aankaup van ‘t pand aan de Börgemeister Conraetzstraot is mei gelök door de gooje samewerking mit ‘t Team Vasgood van de gemeinte Venlo.
Mit de ingebroékname van ‘t nieje Jocuspand haet ôs vereiniging de beschikking euver ‘n ruum pand. Heej kinne naeve de opslaag van koetse, wages en podiumdeile, auk verschillende kleine werkzaamhede plaatsvinde. Auk is d’r ‘n ruumte ingerich veur ‘t umvangriéke archief van de aldste vastelaovesvereiniging van Nederland.
De aankaup en ‘t in broékliën gaeve van ‘t pand door de Stichting "Vrinde van Jocus" pas in eur beleid um de Venlose Vastelaovend in ‘t algemein en Jocus in ‘t biezonder finansjieel te ondersteune. Vuule contribuanten staon heej mit eur jäörlikse beejdrage garant veur. Naeve ‘t steune van Jocus, steunt de Stichting tal van initiatieve in ‘t Stadsdeil Venlo, die vastelaovend mei meugelik make.