Alles euver de tillevisie oétzending

De tillevisie oétzending begint um 20.11 oor. De prissentatie is in hand van Lex Uiting en Funs Pollux. Door de nieje wedstrijdformule en andere camerapositie’s is de oétzending vlotter en dynamischer as de kiéker gewind is. Dankzij de samewerking tösse Venloosch Vastelaoves Gezelschap Jocus, Omroep Venlo, Lagotronics en Theater de Maaspoort kinne de kiékers thoés weer geneete van de 11 leedjes.

Iërder makde Jocus al bekind, det de Leedjesaovend in miërdere facette wuurt verniejd. D’n aovend besteit oét twië rondes, ‘t publiek kin via sms stumme en ein compilatie van de leedjes is noow al via Omroep Venlo te zeen.

Lex Uiting zal de prissentasie vanaaf de buun verzörge en neemp heejmei ‘t stökske van Ton Lamberts euver. Tössedoor zal Funs Pollux onderwiél d’n aovend vordert interviews en reacties haole beej artieste en bezeukers. Heejmei volg Funs Pollux – Wiel Hermans op. Niej dit jaor is, det d’r nao d’n oétslaag ein speciale live oétzending vanoét De Maaspoort kump wao-in Funs Pollux mit winnaers en andere minse truukkiék op d’n aovend.

Tiédes de twiëde ronde kin de kiéker thoés, of in de kefee’s, via sms stumme op eur favoriete leedje. 
In de oétzending wuurt bekindgemak wie de sms stumme kinne waere oétgebrach.

Opus Jocus 2014 haet plaats op zaoterdaag 4 oktober in Theater de Maaspoort en is vanaaf 20.11 oor live te zeen op Omroep Venlo Televisie. Via digitale televisie van Ziggo is de oétzending te zeen in haos gans Naord Limburg en zelfs ein gedeilte van Midde Limburg. Auk is de oétzending via de website van Omroep Venlo live te bekiéke.

Miër informasie op www.jocus.nl