Alle elf finaliste op nieje vastelaoves CD van Jocus

Tiedes de Opus Jocus van 2011 zulle alle finaliste waere beloënd mit ‘n plaats op de nieje vastelaoves CD van Jocus. Normaal gespraoke kômme allein de 4 winnende leedjes op de CD maar dit jaor is gekaoze veur ‘n andere opzet. Dit haet alles te make mit de verbouwing van de Maaspaort. Heejdoor is de Leedjesaovend van Jocus op zaoterdaag 29 oktoëber, de iërste veurstelling in de verniejde Maaspaort.

Doordet Jocus zien Leedjesaovend môt verplaatse, kump de produksie van de nieje CD in ‘t gedrang. Dees môt immers op 11 november 2011 klaor zien. Daorum haet ‘t bestuur van de Venlose vastelaovesvereiniging d’rveur gekaoze um alle elf finaliste op CD te zette. De veer winnende leedjes kômme in zien gehiël op de plaat, de andere 7 nummers in de vorm van ‘n medley. De nummers waere van te veure op band gezat zoëdet in de twië waeke nao de Opus Jocus de CD kin waere aafgerond.

Auk ‘t reglement is waat veranderd. Aan de teksdichters wuurt gevraog um gen dreej maar twië koeplette in te steure. De sloéting veur inzending is op 30 juli 2011. De rippetisies veur de veurseleksie vinde plaats op zaoterdaag 27 augustus 2011. ‘t Môtto veur 2012 is “Dao fleurse van op”.