Dit jaor woorte maarleefs 23 nieje leedjes ingezônde veur de veurseleksie van de leedjesaovend. Waat eine haup talent kint ôs stad! 6 nieje schrievers/komponiste steurde ein leedje in, en 24 debutante zengers make eur opwachting, weej kieke d’r nao oét al dees minse op de buun te zeen!

‘t deilnemersveld besteit netuurlik neet inkel oét nieje gezichte; auk twië ervare alde rotte zien dit jaor truuk mit ein niej leedje, ein leedje wuurt zelfs gebrach door dreej generaties artiste.

Op de veurseleksie waere de 11 finaliste gekaoze die oétintelik eur leedje, begeleid door Jocus’ Hofkapel gaon bringe tiédes opus Jocus Leedjesaovend op 7 oktoëber, live in de Maaspoort. Wilt geej dao beej zien? kaarte zien te kaup via Jocus.nl. Thoes op de bank meigeneete kin netuurlik auk, stum dan aaf op de live oétzending via www.jocus.tv.

JocusTV mak auk ein verslaag van de veurseleksie, det zal op zondaag 27 augustus te zeen zien op dees website en op ôs social media kanale.