’t Leedje Minse kiéke gezônge door Kevin Heiman, Paul van Steenkiste en Rob Mans haet de Jocus Wildcard gewônne en geit as twelfde finalis nao Opus Jocus op zaoterdaag 30 september in Theater de Maaspoort. Van de zes inzendinge behaolde zeej ’t meiste aantal “likes” oftewaal stumme van ’t publiek.

Roel Bisschops, veurzitter van Jocus’ Joeks kemmissie is tevreeje euver ’t nieje initiatief: “Veur ôs is de actie geslaag. Weej hadde neet verwach det d’r zoë vuuël leedjes mei zoele doon. ’t Waas eine nek aan nek race, maar intellik zien alle leedjes veur de Leedjesaovend bekind. ’t Belaof eine moeie aovend te waere. Opniej staon d’r debutante op Jocus buun en huure we eine mix van traditionele en verniejende vastelaovesleedjes, asauk leedjes die allich ein geveulige snaor rake. Neteurlik waere alle reacties as verbaeterpunte meigewaoge nao ’t volgend jaor. Jocus Hofkepel is drök bezig um alle leedjes in te studere.”

Vanaaf maondaag 25 september zien de 12 leedjes al te zeen via Jocus TV. Heejmei kin ’t publiek de leedjes, begeleid door Jocus Hofkepel, alves huure um in de juuste sfeer te kômme.  

De twelf leedjes in volgorde van eur optraeje op de Leedjesaovend zien:
1.   Heb geej det ouk?  Gezônge door Paul Klaassens en Marcel Schuurmans

2.   Zing maar mei   Gebrach door  Karen van Hoften en Bart Janssen

3.   Beejein zien   Gezônge door Joep Bindels, Hans Wijhers en Niels van den Brand

4.   Kômme traone dan gaon we   Gebrach door Annemarieke Leurs, Kristel Roulaux en Roel Daniels-Peeters

5.   Minse kiéke   Gezônge door Kevin Heiman, Paul van Steenkiste en Rob Mans

6.   Venlo mien stad   Gebrach door Piet van Kleef

7.   Wach neet wies morge   Gezônge door Hay Geritz, Petro Janssen, Mark Janssen en Vic Suiker

8.   De pinguïn   Gebrach door Gijs Engels en Jules Fransman

9.   Joeks mak Venlo   Gezônge door Fred Honig, Jorg van der Meij en Marcel Tabbers

10.   Truuk nao hoés   Gebrach door Bibian Baur en Lotte van Bergen

11.   Mien maedje is weer kwiét   Gezônge door Bart Ebus, Etiënne Snel, Loek Heunen en Marco Gielens

12.   Zoë schoën   Gebrach door Hanneke Vestjens

Intreekaarte veur Opus Jocus zien veur € 18,50 verkriégbaar via www.jocus.nl/webshop. ‘t Publiek kin in ‘t decor van de Leedjesaovend geneete van ein aovendvöllend program mit, naeve de twelf finaliste, optraejes van onder andere Linke Mik, eine discjockey en Jocus’ Hofkepèl.

Opus Jocus 2017 vindt plaats op zaoterdaag 30 september in Theater de Maaspoort in Venlo. Miër informasie op www.jocus.nl.