11 finaliste Leedjesaovend bekind, publiek kees 12e finalis via social media
Zaoterdaag 26 augustus vond in de Venlonazaal de Veurselectie van Jocus plaats. De vakjury haet de 11 finaliste veur de Leedjesaovend gekaoze. Dit jaor haet Opus Jocus Leedjesaovend echter veur ’t iërs 12 finaliste. Wies vriedaag 15 september kees ’t publiek via Facebook en Instagram ein 12e leedje, det heejmei ein wildcard verdeent.
De iërste 11 finaliste in willekeurige volgorde:
- De pinguïn, gezônge door Jules Fransman en Gijs Engels
- Joeks mak Venlo, gebrach door Jorg van der Meij, Fred Honig en Marcel Tabbers
- Zoë schoën, gezônge door Hanneke Vestjens
- Truuk nao hoés, door Bibian Baur en Lotte van Bergen
- Wach neet wies morge, gezônge door Vic Suiker, Hay Geritz en Petro Janssen, Mark Janssen
- Zing maar mei, gebrach door Bart Janssen en Karen van Hoften
- Heb geej det ouk? door Paul Klaassens en Marcel Schuurmans
- Beejein zien, gezônge door Joep Bindels, Hans Wijhers en Niels van den Brand
- Mien maedje is weer kwiét, door Marco Gielens, Etiënne Snel, Loek Heunen en Bart Ebus
- Venlo mien stad, gezônge door Piet van Kleef
- Kômme traone dan gaon we, door Annemarieke Leurs, Roel Daniels-Peeters en Kristel Roulaux
‘t Publiek meug dus ein twelfde leedje gaon keeze.
Roel Bisschops, veurzitter van Jocus’ Joeks commissie: “Jocus wilt gaer ’t publiek ein groëtere rol gaeve. Neet allein mit de sms stumme beej de keus van de 4 winnende leedjes op de Leedjesaovend, maar auk beej de keus van de finaliste. Taeves wille we heejmei auk de deilnemers aan de Veurselectie eine extra stimulans gaeve.”
De Jocus Wildcard aktie begint zondaag 27 augustus um 12.00 oor. Deilnemers aan de Veurselectie waovan ’t leedjes tiédes de Veurselectie neet is gekaoze, kinne zelf ein filmke make van eur leedje en dit publicere op Facebook en Instagram. ‘t Publiek kin vervolges wies vriedaag 15 september 12.00 oor eur stum oétbringe door ’t berich te “liken”. ’t Leedje mit de meiste likes, verdeent de Jocus Wildcard en geit as 12e leedje nao de Leedjesaovend. In ’t betreffende berich deent in idders geval ‘t social media account van Jocus vermeldt te waere, same mit de “hashtags” #leedjes17 en #jocuswildcard. Op www.jocus.nl staon de richliéne veur deilname en ’t stumme veur dees aktie.
Roel Bisschops: “Door gebroék te make van de social media, betrekke we ’t publiek op ein liëgdrempelige wies. Dich kins noow vanaaf de bank op diene ipad of tillefoon dus meistumme welk extra leedjes desse gaer op de Leedjesaovend wils zeen. As Jocus zien weej kônstant opzeuk wie we de invölling van Jocus Leedjesaovend aantrekkelikker kinne make. ‘t Idee ôntstond spontaan en weej vonde ’t ein geweldig kônsep det absoluut ein kans verdeent.”
Tiédes Opus Jocus Leedjesaovend strieje dit jaor dus neet 11 maar 12 leedjes um “de Funs”.
Naeve de Vakjury en ein jury bestaonde oét de Vorste van de wiek-vastelaovesvereniginge, kinne zoëwaal de minse in de zaal as de tillevisie-kiéker via sms eur stum oétbringe.
De kaartverkaup is vandaag begôs. Via ’t thoésblaad van Jocus: www.jocus.nl/webshop/toegangskaarte kinne de “e-tickets” besteld waere en koste €18,50.
‘t Publiek kin in ‘t decor van de Leedjesaovend geneete van ein aovendvöllend program mit, naeve de twelf finaliste, optraejes van onder andere Linke Mik, eine discjockey en Jocus’ Hofkepèl.
Opus Jocus 2017 vindt plaats op zaoterdaag 30 september in Theater de Maaspoort in Venlo en is rechstreeks te zeen op Omroep Venlo Televisie. Miër informasie op www.jocus.nl.