11 Finaliste Leedjesaovend 2018 bekind
Op zaoterdaag 25 augustus had in de Venlonazaal de Veurselectie plaats. De vakzjurie had de taak um oét de twië-entwintig inzendinge de 11 finaliste veur Opus Jocus Leedjesaovend 2018 te keeze. Det bleek gen gemekkelikke opgave.
Joep Schouren, veurzitter van Jocus’ Pers & Propaganda kemmissie waas d’r beej: “Op de Veurselectie traoje vuuël nieje, jônge zengers en zengeresse op. ’t Is kwant um te zeen det auk de nieje generasie mit verrassende leedjes ’t podium beklump. Onder de elf finaliste zien neet allein bekinde name, maar auk inkele debutante of nieje combinaties. Aan de veuraovend van ôs jubeljaor belaof ’t noow al eine tôffe leedjesaovend te waere”.
De 11 finaliste in volgorde van eur optraeje op Jocus Leedjesaovend zien:
- Geliék vertrokke, gebrach door Hay Geritz / Mark Janssen / Petro Janssen / Vic Suiker
- Deze is van mich, gezônge door Alex van den Beucken / Alwin Grijseels / Paul Peeters
- As ik dit druim, gebrach door Marissa Verhaegh / Ron Deenen
- As ik de baas waas, gezônge door Jules Fransman / Gijs Engels
- De meus ens weite, gebrach door Bart Jacobs / Luuk Janssen
- D’n ierste fioelis, gezônge door Ken Vaessen / Max Timp
- Geis dich mich belle, gebrach door Karen van Hoften / Ken Vaessen
- Dans, gezônge door Annemarieke Leurs / Kristel Roulaux / Roel Daniëls-Peeters
- Ik kin neet bäöke, gebrach door Fred Honig / Marcel Tabbers
- In de sambaban, gezônge door Hans Wijhers / Joep Bindels / Niels van den Brand
- Ik hald ‘t kort, gebrach door Hay Vercoulen
Tiédes Opus Jocus Leedjesaovend strieje elf leedjes um “de Funs”. Naeve de Vakjury en ein jury bestaonde oét de Vorste van de wiek-vastelaovesvereniginge, kinne zoëwaal de minse in de zaal as de tillevisie-kiéker eur stum oétbringe.
De kaartverkaup is begôs. Via ’t thoésblaad van Jocus: www.jocus.nl/webshop/toegangskaarte kinne de “e-tickets” á €18,50 besteld waere. Veur minse die neet de gansen aovend kinne staon zien d’r beperk zitplaatse te kaup. Miër informasie euver ‘t bestelle laes geej heej.
De Leedjesaovend, aan ’t begin van Jocus zien 16×11 jäörig jubeljaor, kint ein aovendvöllend program. Naeve de elf finaliste zien d’r onder miër optraejes van Joekskepel d’n Heiten Haspel, Net oét Bed, Jocus Hofkepel en de Drekskaters. De prissentatie is in hand van Cielke Sijben.
Opus Jocus Leedjesaovend 2018 vindt plaats op zaoterdaag 29 september in Theater de Maaspoort in Venlo en is rechstreeks te zeen op Omroep Venlo Televisie.