Adjudant René Boitelle is 51 jaor en getrouwd mit Chantal. Zeej hebbe 2 zeuns Juul (23) en Daan (21) en neet vergate eure kielf Funske!

As echte Venlose jông greujde hae op aan de Lomstraot wao opa ein confectiezaak had dae later door zien vader woort veurtgezatte. D’n buurman had eine winkel in tapijt, wao zien vader dök oétheelp en oétintellik euvernoom in waat later Eurotapijt woort.

Nao de liëgere schoël ging hae nao Den Hulster en de Canisiusmavo. Op die schoël is zien noow nog steeds bestaonde groëte vrindegroep ôntstaon. Ald VOS 3 en Aom Tekort is al miër dan 35 jaor eine trouwe vrindegroep. Auk de MDS woort doorlaupe. Al flot daonao woort begôs in de zaak van zien vader. In 2000 besloot hae um in ’t deepe te spring en noow is hae al 25 jaor lang directeur van Bouten Kozijn en Geveltechniek in Baolder.

Mark en René liërde mekaar kinne beej ‘t oétgaon in de stad. In de maonde november en december waas ‘t op zôndaag beej de Yellow Submarine op de Parade altiéd te doon. Minsekinder, Romeo en neum maar op. “Op ein late zondaagmiddaag zoot ik beej de Gouverneur ein bietje op de gitaar te tokkele. Wie Chantal binnekwaam vroog ik of ik ein leedje veur eur moch speule. De res is historie.”

Vastelaovend haet hae van jôngs aaf aan gevierd. Mit de elders in kefeej de Witte en op aldere laeftiéd meilaupe mit de blaage in de Kinderoptoch, optraeje mit ald-Adjudant Marc Derckx as ‘Boktor Joep’ en nog later as bestuurslid van de roemruchte ‘Wiel en Hay fenklup. René is auk lid gewaes van de Ronde Taofel en de Lions Venlo. Voetbalclub FCV oét ‘t Ven löp as eine roëjen draod door zien laeve: as speuler, wao zien vader veurzitter waas, en wao René zelfs 2 kiër de Boerebroélof mei moch make. Taegewäördig is hae bestuurslid.

As Adjudant René van ’t Jocus Dreejspan 2026 kiék hae oét nao de vastelaovend: “Lekker ôngedwônge mit idderein alde feepe en veural geneete. Alle zörg op ein kesje zette. Noëits heb ik besef waat d’r allemaol geregeld môt waere. Alles umgaeve van ‘t mysterie van ein Jocus Dreejspan. Noow staon weej klaor um d’r eine ônvervalsde Venlose vastelaovend van te gaon make. Same ’t Jocus Dreejspan 2026 te meuge vörme is fantasties. En veural mit twië bein op de grond de Joeks en gezelligheid oétstraole dae de Venlose vastelaovend zoë uniek mak. As ik zeen det minse daovan kinne geneete, geneet ik dao zelf döbbel van. Dan geit mien Venloos vastelaoveshert weer aope.”